BINTULU: Pangku pengawa kepala pengajar nyadi pengemudi institusyen pelajar terus nyadi kebuah besai nentuka penyulut sistem pelajar kelebih agi ba kandang menua pesisir di Sarawak.

Menteri ba Opis Premier Sarawak ti mega Kaban Kunsil Nengeri (ADUN) Kakus Dato Sri John Sikie Tayai madah, tanggungpengawa ti disan ukai semina ngaul sukut atur pengawa tang mega nyadi tuai nempa budaya sekula enggau pemereti nembiak.

Ku iya, peneleba iya nyadi kepala pengajar pengelama 10 taun meri penemu enggau peneleba ti dalam bekaul pemar ditapi raban pengajar.

“Kepala pengajar ukai semina nyadi pengemudi ba sekula tang mega nyadi tuai ti nempa budaya sekula, meri jaku ajar ti manah ngagai nembiak sereta nentuka kualiti ngajar enggau belajar semampai ba tikas nyulut,” ku iya.

Iya madah munyi nya ba Pengerami Sanjungan Budi, Lambaian Kasih, Aluan Harapan diatur Gerempung Kepala Pengajar Malaysia (PGBM) Pampang Pelilih Tatau/Sebauh di Restoran Peace Garden ditu kena Hari Lima.

Ku iya agi, pemar pelajar ba kandang menua pesisir baka penanggul suntuk infrastruktur, akses ngagai teknologi digital sereta faktor geografi begunaka pengeransing ari semua raban.

Taja pia, iya meri terima kasih ke pengeransing kepala pengajar ti naka ulih nentuka nadai nembiak kena tinggal ari arus pelajar.

Nambah ke nya, Dato Sri John madah ke Perintah Sarawak terus ngemerat transfomasyen pelajar nyengkaum pekara digital enggau ngena teknologi dudi hari.

Ku iya, entara pekara besai diperati nyengkaum negap pelajar digital enggau Artificial Intelligence (AI), negap literasyen digital sereta ngerembai bungkur Internet kelebih agi ba kandang menua pesisir.

Seraya ba jaku pengelalu, Kaban Parlimen Selangau Edwin Banta madah, pelajar nya sukut beguna ti semampai diberi perati dikena ngemansang komuniti.

Ku iya, bisi urung 36 sekula ba sitak Parlimen Selangau lalu mayuh inisiatif udah dipejalai dikena nyaup ngamatka peminta sekula nyengkaum nyendia komputer sereta perengkaguna pemun.

“Kerejasama semua raban beguna amat nentuka pemansang pelajar ulih dipejalai meruan ke pemaik rebak dudi,” terang iya. - EDISI UKAS