Lumba Sekula Enda Tau Enda Ditegap, Pugu Nempa Nembiak Bepengerai & Disiplin
SIMANGGANG: Nembiak enda tau enda ngambi bagi ba aktiviti lumba ba renggat sekula dikena nempa rebak biak ti bepengerai, disiplin enggau besemekih.
Sapit Menteri Pemansang Pelajar, Inovasyen enggau Pemansang Penau Sarawak, Datuk Francis Harden Hollis nyemetak madah, pengawa ngambi bagi ba lumba ukai semina nyaup nyaga Tikas Pemerat Tubuh (BMI) ti ideal, tang mega nyadi pugu besai nempa pemereti ati nembiak.
“Bala nembiak meseti ngembuan disiplin dikena ngetan BMI ti ideal sereta nyeliah penanggul gemu nengah pengawa ngambi bagi ba aktiviti lumba di sekula.
“Pengerai tubuh nya aset beguna kelebih agi nembiak ti deka nyingkang ngagai dunya kereja ngambi tetangkupka peminta pengaji,” ku iya.
Iya madah munyi nya lebuh bejadi Pengawa Nangguh Merpati Run diatur Gerempung Apai Indai enggau Pengajar (PIBG) Sekula Sekondari (SMK) Simanggang, ditu kena Hari Enam.
Nambah ke nya, iya ti mega Kaban Kunsil Nengeri (ADUN) Simanggang nyemetak madah ke pemesai guna nyendia fasiliti pemun lumba ba sekula nya dikena nempa atlit bepenau.
Ku iya, pengawa ngambi bagi ba lumba ulih nempa semangat beraban, nambah pengetan runding sereta narak disiplin entara nembiak napi pemar dudi hari.
“Raban sekula meseti terus meransang nembiak ngambi bagi ba lumba nyadi sebagi ari budaya pelajar lalu nempa rebak biak ti bepengerai enggau nyadi pugu pemansang Sarawak,” terang iya.
Ba pengawa nya, iya mega ngemendar agih belanja Projek Mit Pemansang Menua Pesisir (MRP) sepenyampau RM20,000 ngagai PIBG SMK Simanggang dikena nyukung pejalai program sepanjai taun tu.
Program Merpati Run nya mega digulu urung 400 penyereta ngaul nembiak enggau mensia mayuh ba mayuh kategori, lalu nyapai tuju dikena ngumpul belanja ungkup pemansang akademik, fizikal, pemanah ulah sereta kokurikulum nembiak seraya negap kerejasama entara raban sekula, apai indai enggau komuniti menua.
Sama datai, Penulung Pegawai Pelajar Pelilih Sri Aman Moslimin Krim, Prinsipal SMK Simanggang Jaya Salleh, pengari Yang Dipertua PIBG Abang Rosni Abang Moslini sereta Pegawai Penyambung Sekula Inspektor Sze Cher Khai. - EDISI UKAS
