MERADONG: Pengawa negap pelajar tumu nembiak mit terus ditegap nengah pengawa ngagihka Geran Khas Projek Mit Pemansang Menua Pesisir (MRP) sepenyampau RM3,000 sereta perambu nyeruri Tabika KEMAS ti repuk ba Meradong.

Kaban Kunsil Nengeri (ADUN) Meradong, Datuk Ding Kuong Hiing madah, pelajar prasekula nya beguna endar dikena nempa rebak bekualiti enggau enda ulih dikelaung ba agenda pemansang.

Iya madah munyi nya lebuh bejadi Pengerami Ramah Mesra dan Jalinan Kasih Unit Prasekula KEMAS Sarikei Taun 2026 di Balai Dayang Bai Bintangor kena Hari Enam.

Ku iya, pengawa meranak puku ba pelajar tumu meri empas timpuh panjai ngagai pemansang modal mensia kelimpah nyadi penentu ngagai kualiti rebak dudi hari.

Nambah ke nya, iya nyemetak madah ke pemesai guna nyeruri fasiliti Tabika KEMAS ti repuk nengah peminta Program Transfomasyen Menua Pesisir (RTP) DUN Meradong ungkup taun 2027.

Ku iya agi, kerejasama apai indai sereta komuniti beguna amat nentuka penemban program pelajar tumu ti dipejalai.

Iya mega ngelalau semua raban terus meri sukung nengah penemu enggau pengelelak dikena negap pemansang pelajar nembiak mit ba renggat tumu. - EDISI UKAS