Miri Nyingkang Maju, Nyadi Hab Ekonomi Utara Sarawak
MIRI: Transformasyen deras Mengeri Miri ari siti “Oil Town” ngagai hab ekonomi besai kandang menua utara Sarawak nunjukka pemujur perambu strategik Perintah Sarawak ti inklusif.
Menteri Pengangkut Sarawak, Dato Sri Lee Kim Shin madah, pemansang ti dijapai ukai semina fizikal tang mega nyerangkung negap sektor ekonomi baru nyengkaum dagang temuai, pelajar enggau servis moden.
“Miri ukai agi semina mengeri penyangkai, tang udah mansang nyadi Hab Ekonomi Kandang Menua Utara Sarawak asil perambu silik ti ngempung pengelebih sektor lama enggau sektor baru.
Iya madah munyi nya lebuh Pengerami Bejadi Program Sarawakku Sayang (SKS) Bagi Menua Miri 2026 ti dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Stadium Miri, kena Hari Enam.
Ku iya agi, pengawa ngatur program bepelasarka konsep 'begulai' enggau prinsip ‘No One Left Behind’ mandang komitmen perintah dikena ngaul rayat sereta nentuka pemaik pemansang ulih diasai.
“Program tu nyadi bukti nyata pengeran tuai ngundang rayat terus nipak prinsip ‘No One Left Behind’,” ku iya nyemetak.
Nambah ke nya, mayuh projek besai terus dipejalai dikena ngentap penuduk Miri nyadi hab ekonomi enggau logistik nyengkaum projek ngerawang Palan Penyangkai Kapal Miri di Kuala Baram beungkus lebih RM200 juta.
Ku iya, projek nya ulih ngeranchak industri maritim, matak pengawa meranak puku luar sereta nyendia beribu peluang gawa bepengelandik ngagai rayat menua.
Pia mega, pemansang rentayan infrastruktur baka Jalai Besai Pan Borneo enggau projek Sabah Sarawak Link Road (SSLR) nyadi penyungkak integrasyen kandang menua sereta ngelimat ungkus logistik lalu ngerembai akses ekonomi kelebih agi ba kandang menua pesisir.
Iya mega madah ke servis Miri City Free Smart Bus meri empas positif ngagai mobiliti rayat, enggau penyampau penumpang ngelui 1.28 juta naka Mac taun tu.
Ba sukut pemansang dudi hari, Lee mega madah ke projek mengeri pintar Kenyalang Smart City sereta kerejasama enggau institusyen antarabansa deka ngangkatka Miri nyadi palan penyulut pelajar enggau pansik di rantau tu.
Iya nyemetak madah, semua inisiatif nya mandang pengeran Perintah Sarawak nentuka pemansang ti sebela enggau inklusif, ukai semina ngemansang kandang menua tang mega nyamin pengelantang rayat.
“Kitai ukai semina ngemansang kandang menua, tang mega nentuka pengelantang nya datai ngagai rayat ngambi sida mega ngasai ke asil pemansang nya," ku iya. -EDISI UKAS
