MIRI: Mengeri Miri ba pelasar nyadi hab ekonomi moden tikas antarabansa lalu seraris enggau pemansang seikas Shanghai nengah pejalai projek Penyangkai Kapal Miri ti deka ngubah landskap ekonomi enggau fizikal kandang menua utara Sarawak.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pemansang penyangkai kapal nya deka nyadi penyungkak besai ngagai pemansang ekonomi baru nyerangkung sektor kapal, kilang, dagang temuai sereta pemansang komersial chara begulai.

Ku iya, kelimpah nyadi hab logistik enggau pintu eksport ungkup produk baka sawit, kayu sereta produk baru, projek nya mega ulih nyendia siti mengeri baru ba Kuala Baram asil pemansang tanah nengah aliran hidrolik.

"Siti ari tungkap saintifik kitai, aliran hidrolik deka mai teda enggau nempa siti endur ti ulih dikemansang nyadi industri kilang enggau mega begunan komersial ti deka ngubah landskap Kuala Baram.

"Tu ila deka nyadi siti mengeri mit ti deka nyadi pematak. Enti tu ila dikemansang kitai, insya-Allah Miri deka nyadi siti mengeri baka Shanghai di China,” ku iya.

Iya madah munyi nya lebuh bejadi Pengawa Bejadi Program Sarawakku Sayang 2026 Bagi Menua Miri, kena Hari Enam.

Ku iya agi, pemansang penyangkai kapal tasik dalam ti ulih nerima kapal besai nyengkaum ship cruise disadang meri pemaik besai ngagai sektor dagang temuai nipak Strategi Pemansang Pengudah COVID-19 2030 (PCDS 2030) ti ngemerat pemansang bepelasarka infrastruktur enggau ekonomi berega.

Berebak enggau nya, Perintah Sarawak mega keran negap rentayan penyambung darat ngaul jalai Miri–Marudi–Mulu sereta Long Panai enggau Long Lama, nyerangkung pengawa ngempu sereta nyeruri jalai batang sepanjai 2,700 kilometer dikena nambah aksesibiliti enggau ngeranchak aktiviti ekonomi menua pesisir.

"Tang, naka diatu kitai meseti mayar lebuh ngena jalai batang enggau endur ti enda manah.

"Panjai jalai batang tu 2,700 kilometer enggau Perintah Sarawak deka ngempu enggau nyeruri jalai tu.

"Tu deka ngubah infrastruktur dia enggau mega penatai pemisi ekonomi rayat," ku iya.

Ba pengawa sama, Premier Sarawak Mega bejadi simbolik nyua Bantu Barang Diguna Pemun Sarawak (SKAS), nyua dokumen Native Territorial Domain (NTD) enggau nyua surat Skim Pelajar Tinggi Pechuma Sarawak (FTES) ngagai 10 nembiak ti nampung pelajar ke Curtin University Malaysia.

Sama datai, tiga Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Prof Dr Sim Kui Hian, Speaker Kunsil Nengeri Sarawak Tan Sri Datuk Amar Mohamad Asfia Awang Nassar, Menteri Pengangkut Sarawak Dato Sri Lee Kim Shin, bala Menteri, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri sereta temuai dipebasa bukai. - EDISI UKAS