SIBURAN: Perintah Sarawak majak chakah bejalaika agenda pemansang menua pesisir nengah projek infrastruktur strategik sereta berati ke pelajar bepuguka pengidup dudi hari nentuka pengelantang rayat ulih ditambah magang.
Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, Perintah Gabungan Parti Sarawak (GPS) berupai nyulut ba pemansang ti seruran dipejalai, kelebih agi nyeruri rentayan jalai alun ba menua pesisir.
Ku iya, nya nyengkaum projek ngaga jalai nyambung Teng Bukap ke Annah Rais diatu benung digaga ngena belanja tumu urung RM80 juta lalu deka ditampung ba renggat kedua ngena agih belanja RM126 juta.
Kelimpah ari nya, ngaga jalai ari Jalai Link Road ke Kehom ti dipelaba beungkus entara RM6 juta ngagai RM9 juta dikeandal nambahka akses penyambung peranak menua nya.
“Tetiap projek pemansang begunaka perambu silik lalu patut digaga nitih pengawa ditetap nyengkaum tinda sereta justifikasyen ti nyengala nentuka projek engkeman,” ku iya bejaku ba mua mayuh rambau Pengerami Malam Muhibbah diatur JKKK Kampung Peraya di Dewan Serbaguna Tapah, ditu, Hari Enam.
Ngenang silik, iya mega ngaku bisi sekeda projek di baruh Agensi Penyeraris Pemansang Greater Kuching (GKCDA) laun ketegal suntuk pengereja pengawa ba agensi bejalaika projek baka Opis Kereja Raya Malaysia enggau raban bekuasa lokal.
Entara projek ti benung digaga nyengkaum nyeruri Jalai Kampung Stabut ke Kampung Peraya beungkus RM5 juta ke diatu ba renggat tinda.
Ngenang pekara bukai, Dato Sri Roland ke mega Kaban Kunsil Nengeri (ADUN) Tarat meransang peranak Kampung Peraya enggau menua ngelingi nya nyerungkai pengulih ekodagang temuai nyadi pemansut ekonomi baru, neladan pemujur sekeda genturung pendiau bukai ti mujur ngulihka penatai pemisi nengah inisiatif nya.
Sama datai, Residen Bagi Menua Serian, Caroline Cleophas Joseph, Sekretari Politik Premier Sarawak, Damen Rejek enggau pengari Pegawai Pelilih Siburan George Harison. -EDISI UKAS
