KUCHING: Bisi 148 iku nerima Gela Besai Nengeri Sarawak ba sebengkah pengawa ke diatur ba Dewan Besar Astana Negeri Sarawak ditu, Hari Dua.

Pengawa nya dipunka enggau penatai Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi.

Dulu agi nerima Pingat Pentadbiran Awam Pingat Perkhidmatan Cemerlang (P.P.C) iya nya Mahra Salleh.

Nangkan nya, Darjah Yang Amat Mulia Bintang Sarawak Pegawai Bintang Sarawak (P.B.S), bela diterima Mohamad Shiblie Abang Sapuan, Ida Rohana Othman enggau Susan Clement Ingun.

Darjah Utama Yang Amat Mulia Bintang Kenyalang Sarawak Pegawai Bintang Kenyalang (P.B.K) disua ngagai Charles Benet Ait, Ir Ts. Daniel Punang enggau Daniel Jok Wan @ Asa Jau sereta 11 penerima ke bukai.

Pingat Pentadbiran Awam Pingat Perkhidmatan Bakti (P.P.B) dulu agi disua ngagai Leftenan Kolonel Ismanizam Ismail, ditangkan Mejar Chester Richard, Mejar Muhammad Adam Carlos Rakem sereta 16 penerima ke bukai.

Udah nya, Darjah Yang Amat Mulia Bintang Sarawak Ahli Bintang Sarawak (A.B.S) disua ngagai Hudien Yusup enggau 13 penerima nangkan iya.

Darjah Utama Yang Amat Mulia Bintang Kenyalang Sarawak Ahli Bintang Kenyalang (A.B.K) diberi ngagai Baie Barang enggau Bajung Ambik sereta 19 penerima ke bukai.

Sub Inspektor Jimmy Ja-Ih ngepunka 36 iku penerima Pingat Pentadbiran Awam.

kelimpah ari nya, 41 iku nerima Darjah Yang Amat Mulia Bintang Sarawak Bentara Bintang Sarawak (B.B.S).

Bela datai maya nya, Sapit Menteri ba Opis Premier Sarawak (Pengatur Projek Agensi Pemansang Kandang Menua, Dewan Bandaraya Kuching Utara enggau Pekara Islam), Datuk Dr. Abdul Rahman Junaidi, Sapit Menteri Pemansang Indu, Nembiak Mit enggau Pengelantang Komuniti Sarawak (Pemansang Indu enggau Nembiak Mit), Datuk Rosey Yunus enggau Sapit Menteri Infrastruktur enggau Pemansang Penyangkai Kapal, Datuk Majang Renggi.-EDISI UKAS