MATU: Projek Jalai Sungai Passin/Matu udah digaga 76.18 peratus naka ke diatu, ti mega dulu agi ari langgur ke ditimpuh.

Sapit Menteri Infrastruktur enggau Pemansang Penyangkai Kapal Sarawak, Datuk Ir. Aidel Lariwoo madah, projek nya diatu mujur digaga lalu disadang ulih tumu agi tembu, urung bulan Mac taun siti agi.

"Naka ke diatu, projek tu digaga enggau mujur. Tu chukup manah," ku iya maya ngabas projek nya, Hari Satu tu tadi.

Projek 17.6 kilometer pemanjai enggau ungkus manggai RM77.8 juta nya digaga dikena nambahka sistem jalai menua pesisir nyengkaum di Matu.

Kelimpah ari nya, iya mega madah, projek nya semampai deka diperati ngambika ulih tembu enggau mujur nitih langgur.

"Kitai semampai nurun ngabas projek tu taja naka ke diatu projek digaga enggau manah," ku iya madah baru.

Nangkan nya, Kaban Kunsil Nengeri (ADUN) Daro, Dr Safiee Ahmad madah, tujuh genturung pendiau di menua nya agi ngena jalai sungai.

Ku iya, penembu projek nya ila ukai semina beguna nyadika jalai aja tang bela deka ngepun projek bukai baka projek Skim Karan Menua Pesisir (RES) ti udah dikemendarka digaga.

"Penembu jalai tu ila bela ngelengkaska agi penumbuh macham projek pemansang ke bukai," ku iya madah. -EDISI UKAS