KUCHING: Perintah Sarawak numbuh siti insentif khas ungkup orang kereja perintah ke gawa nyaga orang tuai.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, insentif RM200 sebulan nya nyadi chara strategik meri pengelantang ngagai sida, nyungkak pemanah tikas gawa kelimpah meri peluang gawa ba sektor nyaga.
Ku iya, insentif nya bela masa pemeras sida gawa lebih agi pengawa nya endang meri penguji dikena nentu pengelantang orang tuai.
"Insentif tu mega dikena kitai meri peransang ngagai sida ke gawa ba institusyen nyaga orang tuai ngambika sida semampai gawa enggau manah," ku iya madah.
Iya bejaku munyi nya maya Pengawa Bantu Mayar Insentif Nyaga Orang Tuai ngagai orang kereja perintah di Rumah Sri Kenangan ditu, Hari Dua.
Iya mega madah, pengawa nyaga orang tuai begunaka latih enggau kus ti engkeman.
"Tu pengawa ti dipebasa, begunaka pengelandik enggau penemu," ku iya madah baru.
Iya mega madah, pemansang industri nyaga ('caregiver industry') bisi pengulih nyadi peluang gawa lebih agi ungkup raban nembiak nyerumba pemayuh orang tuai di Sarawak majak nambah.
Datuk Sri Fatimah madah, peminta gawa bepengelandik ba pengawa nya disadang bela deka nambah ukai semina ba institusyen pengintu pengelantang aja tang mega ba renggat komuniti enggau genturung pendiau.-EDISI UKAS
