KUCHING: Sarawak benung berati deka ngena teknologi satelit ngambi gambar gaya tanah nengeri tu dikena ngemujurka pengawa ngaga pemansang bepelasarka data dudi hari.

Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, inisiatif nya benung diperati begulai enggau Opis Tanah enggau Survei (JTS) dikena ngumpul data silik bekaul gaya tanah ba nengeri tu.

"Tu nyengkaum ba kampung bakau, kampung, bansa kayu sereta ke bukai ngambika bisi dikena kitai ngelanggur pemansang dudi hari," ku iya madah.

Iya bejaku munyi nya maya bejadika Konferens Injiring Universiti Malaysia Sarawak (UNIMAS) Ke-16 2026 ditu, Hari Dua.

Nambahka jaku iya, Premier Sarawak madah, dunya diatu benung deras mansang ngena teknologi 'artificial intelligence' (AI) generatif nyadi AI agentik sereta disadang deka beridar ngagai renggat AI strategik ti bepelasarka data betikas besai dalam kandang lima taun ke deka datai.

Ku iya, pengulih ngumpul sereta ngena data nyengkaum ngena satelit deka nyadi pelasar pengerembai ekonomi global dudi hari.

Nya alai, iya madah, Sarawak deka nyungkakka pemansang sektor aeroangka dikena napi ubah nya.

"Lalu ari nya kitai beguna injinia rebak baru ngembing pemansang kitai. Tu mih pemesai guna injiring," ku iya madah baru.

Ba pengawa nya, Datuk Patinggi Abang Zohari dipebasa ngemataka pengawa nyua gela Profesor Adjung Fakulti Injiniring ngagai Kaban Parlimen Tanjung Manis ke mega Chairman Lembaga Pembangunan Industri Pembinaan (CIDB) Malaysia Dato Ir Yusuf Abdul Wahab.

Iya bela ngemataka pengawa besilih 11 iti Sempekat Pemereti Ati (MoU) ke ditanggam UNIMAS enggau macham universiti antarabansa sereta organisasyen nasional enggau antarabansa nyengkaum pemain industri injiring.

Pengawa besilih MoU nya diatur TNB Lab Sdn Bhd, Pukyong National University Korea, University Of Kratie Cambodia, Pipeline Integrity Consulting Engineers Pte Ltd Singapura, Spring Semiconductor Sdn Bhd, Advanced Semiconductor Academy Of Malaysia, ZHA Environmental Sdn Bhd, MYCOLD, Dura Technology (Sarawak) Sdn Bhd, EPR (Kuching) Sdn Bhd enggau Opis Servis Engkelebat Sarawak.

Bela datai, Menteri Utiliti enggau Telekomunikasyen Sarawak Dato Sri Julaihi Narawi, Chairman Komiti Direktor UNIMAS Tan Sri Datuk Seri Panglima Sulong Matjeraie, Mandal Canselor UNIMAS Dr Ahmad Hata Rasit sereta temuai dipebasa ke bukai. -EDISI UKAS

Pemberita: Ahmad Daniel Faiz
Gambar: Muhammad Rais Sanusi