MIRI: Program Sarawakku Sayang (SKS) 2026 Bagi Menua Miri nurai pemujur ti ngemegah ati lebuh matak 23,959 pengusung sekumbang tiga hari program nya diatur, lalu nya ngayanka penemban chara 'outreach' perintah ngundang rayat.

Sapit Menteri Nembiak, Lumba enggau Pemansang Orang Dagang Sarawak, Datuk Dr Ripin Lamat madah, pemayuh tubuh bala ti datai nya ngayanka timbal ti chukup manah ari rayat menua nya ba program baka nya.

Ku iya, program diatur di Bagi Menua Miri ngaul 43 agensi ngambi bagi enggau 147 servis, ngasuh program nya nyadi pelasar bejalaika servis perintah ti komprehensif agi ngagai rayat.

“Sekumbang tiga hari program diatur berengkah Hari Lima nyentuk Hari Minggu, bemacham isi program udah diatur nyengkaum pemandang agensi, aktiviti bepengerai, pengawa dagang, sesyen bekunsi penemu enggau program nambah penemu baka penyalah siber.

“Program tu ukai semina meri akses terus ngagai rayat ngadu pengawa enggau agensi perintah aja, tang ngerapitka kaul entara perintah enggau rayat ba renggat baruh,” ku iya.

Iya nyebut jaku nya lebuh bejaku ba Pengerami Nangguh Sarawakku Sayang (SKS) 2026 Bagi Menua Miri diatur Hari Minggu.

Iya mega madah, inisiatif pengawa dagang nengah Sarawak Kitchen ngerikod asil bejual sepenyampau RM337,227 kandang tiga hari, lalu nya meri empas positif ngagai penatai pemisi orang dagang.

Iya madah baru, pemujur program nya asil kerejasama rat entara perintah nengeri, agensi gawa, sektor peribit enggau peranak menua nya.

Iya mega meri terima kasih ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Opemg ti seruran ransing nentuka program besai empas baka SKS ulih diatur ungkup pengelantang rayat.

Kelimpah ari nya, iya mega meri terima kasih ngagai semua raban nyengkaum komiti pengatur, agensi perintah, voluntia enggau bakih media ti udah sama kiruh gawa ngemujurka program nya.

Pengerami nangguh program nya meda pengawa nyua perais E-Pekit sereta chabut benasip ti dipenyadi Sapit Sekretari Perintah Sarawak (Administrasyen), Felicia Tan Ya Hua sereta Residen Bagi Menua Miri, Galong Luang.

Sama datai, Direktor Unit Matau Pejalai Projek Sarawak, Sapiah Daud.-EDISI UKAS