MUKAH: Penyerakup pupu bansa enggau pengarap majak nyadi pengering ti ngasuh Sarawak tegap enggau lantang.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol nyemetak madah, pengering nya patut dijaga manah enggau ditegap lebih agi raban nembiak ti nyadi rebak penyulur nengeri.
Ku iya, raban nembiak ngesan pangku pengawa besai nentuka Sarawak tetap nyadi nengeri maju, likun enggau lantang.
“Raban nembiak diatu nyadi rebak ti deka nyulur legasi penyerakup tu, lalu ngaduka pemujur Sarawak dudi hari ngambi terus mansang dalam pengelain,” ku iya.
Iya nyebut jaku nya lebuh bejadika Pengerami Hi-Tea serimbai Aum Besai Tiga Taun Sekali Gerempung Nembiak Nasional Besatu Sarawak (SABERKAS) Pampang Balingian enggau Tellian ungkup penggal 2026-2029 di Hotel Kingwood Mukah, kena Hari Minggu.
Kaban Kunsil Nengeri (ADUN) Semop nya mega madah, ubah landskap rebak biak jeman maya diatu mayuh agi bekenaka teknologi enggau penerang nadai betatak.
Nya alai, iya minta nembiak patut seruran sedia nelebaka diri enggau nyingkang begulai enggau pemansang maya hari ti deras.
Datuk Abdullah muji bala tuai Perintah Sarawak ti regas ngelanggur bemacham agenda pemansang, lebih agi ba sektor ekonomi.
Ku iya, nengeri tu enda ulih tinggal lalu patut terus nyingkang nentuka pemansang dijapai.
Iya mega meransang raban nembiak ngena peluang ti disedia enggau regas ngaul diri ba pemansang nengeri.
Ba pengawa nya, iya mega bisi ngemendarka geran Projek Pemansang Mit Menua Pesisir (MRP) bela RM10,000 ngagai SABERKAS Pampang Balingian enggau Tellian.
Dulu ari nya, ADUN Balingian, Abdul Yakub Arbi enggau ADUN Tellian, Royston Valentine, sama meri terima kasih ngagai semua kaban SABERKAS kededua pampang ti sama ransing gawa negapka organisasyen nembiak ba menua diri empu.-EDISI UKAS
