BETONG: Regata Betong 2026 diperati nyadi penyungkak ekonomi menua nya ari pengulih diangkat nyadi program besai ninting taun, nyengkaum perambu ngangkatka waterfront nyadi taba mendam ngatur pengerami nya.

Kaban Parlimen Betong, Dato Dr Richard Rapu ke ngari ke Sapit Premier Sarawak Datuk Amar Douglas Unggah Embas madah, pemujur sekali tu ngayanka pengulih pengerami nya meransang aktiviti ekonomi, lebih agi orang dagaing mit enggau komuniti menua.

Iya nyebut jaku nya lebuh dirandau serimbai Pengerami Nangguh Regatta Betong 2026 di Astaka Utama Regata, Waterfront Betong, Hari Minggu.

Iya madah, pemanah timbal diterima, pengudah kepenudi diatur taun 2010, ngerandang peluang ngagai program nya diangkat nyadi program ninting taun ti berurun enggau besai agi empas.

Berindik ari nya, iya madah ke randau silik deka diatur begulai enggau pengari rayat ba sitak Parlimen Betong dikena nyerenih pengulih timpuh panjai regata nya.

Ba penemu iya, waterfront Betong diatu disikap perengkaguna ti engkeman nyadi taba mendam ngatur program nya.

Ku iya, pengawa ngadu manah endur nya deka diperunding nentuka endur nya sistematik enggau ngelantangka pengusung.

Entara perambu nya nyengkaum nyendiaka entepan kerita ti chukup, ngaduka jalai, ngaga pelaman khas ungkup orang dagang sereta nambah perengkaguna pemun baka agu mensia mayuh, bekal kuasa karan enggau ai beresi.

Pengawa nya beguna endar dikena nambahka kapasiti ngatur program sereta nentuka pengusung enggau orang dagang lantang.

Regata Betong 2026 ukai semina ngidupka baru tradisyen pekit lumba ai lokal aja, tang ulih diangkat nyadi produk dagang temuai besai ti ulih matak mayuh agi pengusung sereta ngerichah ekonomi pelilih nya dudi hari.-EDISI UKAS