ITF Asia/Oceania 2026 Ngerapit Kaul Antarabansa Pemain Tenis Biak
KUCHING: Pekit ITF World Junior Team Competition Asia/Oceania Final Qualifying 2026 ukai semina kelang bepekit aja, tang nyadi pelasar ngerapit kaul entara pemain biak ari selampur rantau Asia enggau Oceania.
Sapit Menteri Pengangkut Sarawak (Sungai enggau Tasik), Datuk Henry Harry Jinep madah, pekit ti ngempuruka tim ari mayuh menua nya ngayanka pengerapit kaul enggau kerejasama serantau nengah main enggau lumba.
Ku iya, taja pengawa bepekit ba kelang diberi perati, tang kaul rama ba luar kelang baka pengerami makai lemai enggau randau mega meri pemaik ngagai pemansang atlit biak.
“Ari begempuru baka tu, bala pemain ukai semina bepekit aja, tang bisi peluang ngelala pangan diri, besilih peneleba enggau mereti ke pengelain budaya sereta chara main tenis,” ku iya.
Iya nyebut pekara nya ba Pengerami Makai Lemai Ngerami & Ngerapit Kaul Pekit ITF World Junior Team Asia/Oceania di Hotel Waterfront, Kuching kena Hari Minggu.
Iya nyemetak madah, kaul ditanggam sekumbang pekit nya ulih nyadi pun ngagai kerejasama timpuh panjai entara menua, lalu negapka ekosistem pemansang main enggau lumba di rantau Asia sereta Oceania.
Nambah ke nya ku iya, menua baka Australia, China, India, Jepun, Korea, Kazakhstan, New Zealand sereta menua Asia Tenggara nyengkaum Malaysia sama ngayanka pengeran ngemansangka main tenis ba renggat baruh.
Sarawak mega majak negapka penuduk nyadi kelang ngatur pekit lumba enggau main antarabansa lebuh mujur ngatur sekeda pekit tikas dunya ba timpuh ti serekat.
“Tu nyengkaum ngatur Pekit Premier Sarawak Cup J300 enggau WCTF sebedau tu, ngasuh pekit ITF nyadi entara pemujur besai negapka industri lumba enggau main nengeri,” terang iya.
Iya mega meri terima kasih ngagai Serakup Lawn Tenis Sarawak sereta semua raban tis ama ransing enggau naka ulih gawa nentuka pekit nya diatur lanchar.
Iya madah baru, pekit baka nya diatur belama ukai semina nambahka standard lumba enggau main lokal aja, tang ngerandang peluang nanggam kaul antarabansa ti rapit agi nengah pelasar main enggau lumba.-EDISI UKAS
