TINJAR: Projek ngaduka jalai ari Long Aya ke Long Sobeng ti bekenaka ungkus RM133.4 juta disadang ulih tembu dalam kandang 30 bulan.

Sapit Premier Sarawak, Datuk Amar Douglas Uggah Embas madah, jalai nya deka ngepunka pemansang enggau pengerembai ekonomi peranak menua nya.

"Di Telang Usan bisi 1,630 kilometer jalai batang. Lalu jalai ke diadu kitai sehari tu iya nya siti ari jalai batang.

"Kitai ngaduka jalai tu laban menua tu tau bendar dikemansangka," ku iya madah.

Iya bejaku munyi nya maya pengerami nasih tanah Projek Ngadu Jalai ari Simpang Lapok ke Long Puoh, Tinjar (ari Long Aya ke Long Sobeng) di Tinjar, Hari Empat.

Projek nya mungkur jalai Long Aya ke Long Sobeng, Tinjar urung 35 kilometer pemanjai ke diadu ngena standard JKR R1.

Projek nya bela bisi ngaga empat iti jematan iya nya Jematan Sungai Aya 40 meter pemanjai, Sungai Sepidik (54 meter) enggau dua jematan di Sungai Sobeng bela 30 meter pemanjai.

Penembu projek nya ila disadang deka mai pemaik ngagai urung 2,714 peranak rumah panjai sepemanjai jalai nyengkaum Long Aya, Long Sobeng, Long Dunin, Long Pejawai, Long Aton, Long Nuah enggau Long Puah.

Nambahka jaku iya, Datuk Amar Dougas Uggah madah, projek nya bela mai pemaik ngagai pekara pelajar enggau pengerai di Telang Usan.

"Penembu projek tu ila mega deka ngemuntangka pengawa mai asil betanam betupi ngambika dijual baka di Long Lapok enggau Long Lama," ku iya madah baru.

Projek nya sebagi ari inisiatif Agensi Pemansang Tanah Tinggi (HDA) nengah Opis Pemansang Koridor Wilayah (RECODA).

Bela datai maya nya Kaban Parlimen Baram, Datuk Anyie Ngau, Kaban Kunsil Nengeri (ADUN) Telang Usan, Dato’ Dennis Ngau, Tuai Pegawai Eksekutif RECODA, Datuk Ismawi Ismuni enggau Sekretari Politik Ngagai Premier Sarawak, Dominic Nyurang Ajang. - EDISI UKAS