KUCHING: Pemansang Sitak Samarahan majak disungkak nengah agih RM1.254 billion tauka 83.61 peratus ari semua RM1.5 bilion udah dikemendar ungkup suku keterubah taun 2026 dikena ngaga projek nengah Agensi Pemansang Menua Samarahan (IRSDA).

Menteri Dagang Temuai, Industri Kreatif enggau Seni Pemerindang Sarawak ke mega Chairman Komiti Pemandu IRSDA, Dato Sri Abdul Karim Rahman Hamzah madah, ari semua 637 iti projek ke dilanggur, bisi 512 iti projek tauka 80.38 peratus udah tembu digaga.

"Kelimpah ari nya, 32 iti projek (5.02 peratus) agi benung digaga lalu 87 projek (13.66 peratus) benung dilanggur enggau enam projek (0.94 peratus) enda nyadi digaga ketegal bisi penanggul bukai," ku iya.

Iya nerangka pekara nya maya betuaika Aum Komiti Pemandu IRSDA ditu, Hari Tiga.

Iya mega madah, RM236.13 juta tauka 15.74 peratus agi projek benung dilanggur lalu laluh ari nya RM9.78 juta tauka 0.65 peratus nyadi Pool Savings IRSDA.

Kaban Kunsil Nengeri (ADUN) Asajaya nya bela madah pemesai reti penyuah ngabas projek ngambika semua projek ulih digaga enggau mujur.

Ba pengawa nya, bela diatur iya nya pengawa nyuaka Buletin IRSDA 2025 enggau bup Rintai enggau lokaliti Projek IRSDA ngagai semua pengari rayat di Sitak Samarahan.

Bup nya bisi ngerikod 637 iti projek pemansang ke digaga kenyau ari penumbuh IRSDA ti mungkur tiga Parlimen iya nya Kota Samarahan, Batang Sadong enggau Batang Lupar.

Sama bela datai, Menteri Utiliti enggau Komunikasyen Sarawak ke mega ADUN Sebuyau Dato Sri Julaihi Narawi, Sapit Menteri Infrastruktur enggau Pemansang Penyangkai Sarawak ke mega ADUN Sadong Jaya Datuk Ir Aidel Lariwoo, Kaban Parlimen Batang Sadong Rodiyah Sapiee, Kaban Parlimen Batang Lupar Mohamad Shafizan Kepli, ADUN Simunjan Awla Dris, Residen Sitak Samarahan Mohamad Irwan Bahari Bujang enggau Pegawai Tadbir Khas IRSDA Anuar Da'an. -EDISI UKAS