LAWAS: Skim nangkir Kampung Aru di baruh Langgur Pemansang Malaysia Lumpar Ke-13 (RMK-13) deka nyadi penyungkak pemansang serap menua nya, lebih agi ngaul genturung pendiau ba tanah seberai Sungai Sundar.
Sapit Premier Sarawak, Datuk Amar Awang Tengah Ali Hasan madah, inisiatif nya ukai semina deka ngeranchak pemansang fizikal aja, tang mega nambahka pengelantang sosioekonomi peranak menua nya chara inklusif enggau meruan.
“Tuju skim tu ngeranchakka pemansang sereta nambahka pengelantang peranak menua,” ku iya ba Program Pejalai Aspirasi Nadai Dadah (JABD) di Kampung Aru Sundar, ditu, Hari Minggu.
Ngenang silik, iya madah ke sekeda projek sosioekonomi bela dilanggur, nyengkaum pemansang umai padi moden enggau komersial sereta berimbaka tanah adat dikena ngulihka penatai pemisi baru ngagai komuniti menua pesisir.
Iya mega madah, pemansang fizikal enggau ekonomi meseti sebela enggau pemansang rama ti entap, lebih agi ba pengawa munas salah guna dadah ti majak ngirauka ati.
Ku iya, penyalah dadah diatu ukai semina orang besai tuai aja, tang mega nyerekai ngagai nembiak enggau nembiak sekula nyentuk meri empas negatif ngagai runding, pengerai enggau produktiviti.
Berindik ari nya, Kaban Kunsil Nengeri (ADUN) Bukit Sari nya minta mensia mayuh regas agi bejaika pangku pengawa munas dadah lalu ukai semina ngandalka agensi penerit adat aja.
Iya mega merambu raban polis nyendiaka lumur hotline ba tetiap genturung pendiau ngambi peranak nyamai meri penerang bekaul pengawa ti salah, kelimpah terit agi bejalaika adat sereta ngena Skuad Benchidadah ti nyadi inisiatif nemban ba renggat baruh.
Sama datai, Kaban Parlimen Lawas Dato Henry Sum Agong, Direktor Agensi Benchidadah Nasional (AADK) Sarawak Abdul Hamediee Ibrahim, Residen Bagi Menua Limbang Yunus Tambi enggau Sekretari Politik Premier Sarawak Awangku Jinal Abedin Dato Pengiran Jawa. -EDISI UKAS
