LAWAS: Projek ngaga jalai ari Kampung Murud Suang ke Simpang Long Pos deka ngerumban pengawa ngenegapka rentayan jalai penyambung menua pesisi lalu meransang ekonomi menua nya tumbuh.
Sapit Premier Sarawak, Datuk Amar Awang Tengah Ali Hasan madah, projek beungkus RM112.7 juta nya siti inisiatif Perintah Besai di baruh Opis Menteri Pemansang Genturung Pendiau enggau Kandang Menua (KKDW) ti dipejalaika Opis Parit enggau Entali Ai (DID) Sarawak ungkup nyendiaka sambung jalai ti lantang enggau likun agi ngagai peranak.
“Tang enti kitai nganti nyentuk agih belanja chukup magang diberi, kitai semina deka nadai utai ulih dikereja,” ku iya.
iya nyebut jaku nya ba Pengawa Nasih Tanah Projek Ngaga Jalai ari Kampung Murud Suang ke Simpang Long Pos di Kampung Murud Suang, kena Hari Minggu.
Iya nyemetak madah, kontraktor dipadu gawa meseti ngaga projek nitih taga enggau spesifikasi ditetapka, kelimpah matau belama dikena nyamin kualiti kereja.
Iya mega minta peranak menua meri kerejasama ngambi projek lanchar nyengkaum ba tanah ti kena renchah projek.
“Kitai deka nentuka tetiap tanah ti kena renchah projek, nyengkaum tanah adat ti bisi orang ngempu, deka diberi pampas nitih penetap nyengkaum utai tanam ti bisi,” terang iya.
“Semangat kerejasama enggau penyerakup ti tegap ngasuh kitai kering.
“Anang kita alah ajum jaku sekeda raban ti semina ngira diri empu aja nyentuk ngachau peluang ekonomi enggau pengelantang rayat,” ku iya.
Iya nyemetak madah, pemansang infrastruktur baka projek jalai nya deka ngerandang mayuh agi peluang ekonomi sereta ngangatka tikas idup rayat di Lawas, seriris enggau agenda pemansang Sarawak.
Sama datai, Sapit Menteri KKDW Datuk Rubiah Wang, Kaban Parlimen Lawas Dato Henry Sum Agong, Direktor DID Sarawak Datu Ir. Ts. Ahmad Denney Ahmad Fauzi, Direktor Pemansang Nengeri Sarawak Dato Jasni Jubli, Residen Bagi Menua Limbang Yunus Tambi sereta pengari agensi bejalaika projek enggau tuai raban bansa menua nya.-EDISI UKAS
