KUCHING: Kesatuan Eropah (EU) meda Sarawak nyadi bakih manah ba pengawa negapka kerejasama strategik, lebih agi ba bidang ekonomi, kuasa gadung enggau pemansang meruan.

Duta Besai Kesatuan Eropah ke Malaysia, Rafael Daerr madah, ba konteks Malaysia, Sarawak ngesan pangku pengawa besai laban chara pemansang sida ti besai juluk enggau nipakka tuju EU.

“Ba kami di renggat global, Malaysia nyadi bakih kunsi besai ba pengawa nyungkak pengelantang begulai sereta nyaga pengelikun enggau penegap serantau kededua raban.

“Di Malaysia, Sarawak bejalaika pangku pengawa besai ba mayuh chara ti besai juluk ba mayuh bidang ti setipak enggau tuju kami.

“Tu nyengkaum nguing ngagai kuasa gadung, nambah pemansut kuasa gadung sereta kerejasama strategik ti ila ukai semina negapka kededua raban aja, tang nambah pengetan begulai,” ku iya.

Iya nyebut pekara nya pengudah ngatur penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kompleks Satria Pertiwi kena Hari Satu.

Rafael madah baru, ba landskap geopolitik enggau geoekonomi global ti majak mayuh pemar, kerejasama entara EU enggau Malaysia, nyengkaum Sarawak, majak beguna dikena nambah pengetan enggau ekonomi ngati kediri kededua menua.

Ku iya, tuju penemuai gawa keterubah iya ke Sarawak nya negapka kaul ke bisi sereta nyukung kerejasama entara menua kaban EU enggau Sarawak.

Entara pekara diperati ba kerejasama sama nya ku iya nyengkaum kuasa gadung, meranak puku, pelajar sereta pemansang meruan ti dikeandal ulih meri pemaik begulai sereta negapka pengetan kededua raban.

Sama datai Direktor Opis Kandang Menua Sarawak Opis Menteri Luar Nengeri Malaysia, Dato Fenny Nuli.

Tembu penemuai basa nya, Premier Sarawak mega nerima penemuai basa ari Menteri Nembiak enggau Lumba Malaysia Dr. Mohammad Taufiq Johari.

Entara pekara dikerandau iya nya bekaul kerejasama entara Perintah Besai enggau Perintah Sarawak, sereta pengawa besikap Lumba SEA 2027, ke alai Sarawak nyadi siit ari empat kluster besai.

Sama datai Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah, dua Sapit Menteri Nembiak, Lumba enggau Pemansang Orang Dagang Sarawak Datuk Gerald Rentap Jabu enggau Datuk Dr Ripin Lamat, KSU, KBS Dato' Rahimi Ismail, Tuai Pegawai Eksekutif Sekretariat Pengari Lumba SEA Malaysia Datuk Rashid Yaakub sereta Sapit Sekretari Perintah Sarawak (Operasyen) Datu Hii Chang Kee.-EDISI UKAS