BINTULU: Kontinjen Special Olympics (SO) Sarawak ngukir sejarah lebuh dipadu nyadi champion besai Lumba Olimpik Khas Malaysia Ke-6 Sarawak 2026, lalu nya negapka penuduk nengeri tu ba kelang lumba inklusif menua.

Sarawak ukai semina menggi gelar Tim Pemadu Nyulut aja, tang mujur bulih 56 midul emas, 68 pirak enggau 52 engkeraju, asil penyulut bala atlit sekumbang pekit diatur ditu ari 24 nyentuk 26 April tu tadi.

Pemujur nya mega disukung kontinjen tuai rumah nguasa nyau deka semua achara ti dipekit lebuh lapan achara, SO Sarawak menang ujuh ari nya iya nya padang enggau balapan, nyemerai, bocce, ping pong, boling, badminton enggau bola keranjang, semina achara main bol aja diempu SO Kedah.

Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, pemujur nya ukai semina ngayanka penyulut atlit aja, tang nusui cherita pasal raban timpang pendiau (OKU), lebih agi sida ti muntat ba pelajar enggau tasal (IDD), ulih nyapai penyulut enti diberi peluang sebaka.

Iya madah, pemansang OKU patut bepuguka inklusiviti, sebela enggau diserangkung, ukai semina kelai aja ari nyendiaka akses pelajar, pengerai, lumba enggau bantu komuniti nentuka raban nya enda dikemelu.

Iya mega madah, inisiatif inklusiviti patut berengkah ari pun ngena chara pelajar baka ‘No One Left Behind, kelimpah nambahka program pengerai baka 'Healthy Athletes' ti beperesa enggau berubat ngagai atlit.

Sama datai, dua Sapit Menteri Pemansang Indu, Nembiak Mit enggau Pengelantang Komuniti Datuk Rosey Yunus enggau Datuk Mohammad Razi Sitam, Presiden enggau Tuai Pegawai Eksekutif Kumpulan Bintulu Port Holdings Berhad Dato Ruslan Abdul Ghani, Sapit Chairman Kaunsil Pemansang Bintulu Dato Haidar Khan Asghar Khan, Sekretari Mendam Opis Menteri Pemansang Indu, Nembiak Mit enggau Pengelantang Komuniti Sarawak (KPWK) Nur Alina Abdullah enggau Presiden Special Olympics Malaysia Bong Koi Sin. -EDISI UKAS