KUCHING: Sarawak nempa siti agi pemujur bepun ari Sarawak Waste Management Sdn Bhd numbuh prototaip loji ‘waste-to-energy’ ke ulih ngasil nyentuk 5 kilowatt (kW) kuasa karan.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pemujur nya ngelai pengulih teda tauka barang enda diguna nyadi pun penatai ekonomi baru iya ke diatu benung digaga perintah negeri.

Ku iya, Sarawak diatu benung betapi enggau urung 700 tan barang teda ninting hari, alai penyampau nya majak nambah ketegal penyampau tubuh rayat mansang mayuh.

“Prototaip ke dipadah aku tu, ke dipeda aku tadi, endang manah ngasil gas ari barang teda lalu udah nya digaga nyadi hidrogen alai ari hidrogen nya deka nyadi kuasa karan.

"Tu diatu bepanggai ba pengulih gas nya empu alai loji tu ulih ngasilka urung 5 kW," pia ku iya.

Iya bejaku munyi nya maya program Ngabas enggau Program Penerang bekaul Prototaip Kogenerasi Gas nyadi kuasa ba Taman Pengurusan Sisa Bersepadu Kuching (KIWMP) Mambong, ditu, Hari Satu.

Datuk Patinggi Abang Zohari madah, belalauka menua Scandinavia baka Finland ke udah mujur mulai ka asil ari barang teda ke ulih nyadi pun penatai ekonomi ngagai perintah.

Iya madah, ari pemayuh pemeranak puku enggau aktiviti industri di nengeri tu, pengawa bekenaka ekonomi moden beguna dikena nentuka barang teda ulih mulai ka asil.

"Ke beguna iya nya kitai nemu ngena barang teda nyadi penguntung.

“Tu ukai semina meri penguntung ngagai rayat, tang selampur Sarawak alai kitai ulih nyadi menua ke endang amat beresi sereta likun ba rampa menua di Malaysia," ku iya madah baru.

Bela datai Sapit Premier Sarawak Datuk Amar Profesor Dr Sim Kui Hian, Sekretari Perintah Sarawak ke mega Chairman Sarawak Waste Management Sdn Bhd Datuk Amar Mohamad Abu Bakar Marzuki, Sapit Menteri Kuasa enggau Pemeruan Rampa Menua Datuk Dr Hazland Abang Hipni, Sapit Menteri Pengangkut Sarawak Datuk Dr Jerip Susil, Sapit Perintah Sarawak (Pengatur Ekonomi enggau Pemansang) Dato Sri Dr Muhammad Abdullah Zaidel, Direktor ke mega Tuai Pegawai Eksekutif Sarawak Waste Management Sdn Bhd Stephen Chin sereta temuai dipebasa ke bukai. -EDISI UKAS