Musim Kemarau: Mensia Mayuh Ditangkan Enda Sepeneka Betunuka Babas
MIRI: Mensia mayuh ditangkan enda sepeneka betunuka babas maya musim kemarau ti tau bendar ngasuh penusah sebun enggau tanah kerapa angus nyadi di Sitak Miri maya tu.
Sapit Premier Sarawak, Datuk Amar Douglas Uggah Embas enggau nya minta semua agensi ba komiti pengatur penusah ngenyit di Sitak Miri ngambika nyikap diri napi penusah enda disadang nyadi.
"Tu beguna ngambika semua penusah ke nyadi ulih diputar enggau lengkas lalu ngurangka penanggul bukai lebih agi bekaul pengelikun mensia mayuh enggau rampa menua," ku iya madah.
Iya bejaku munyi nya maya Program Penerang Komiti Pengatur Penusah Ngenyit Sitak (JPBB) Miri ditu, Hari Empat.
Iya ke mega Chairman Komiti Pengatur Penusah Ngenyit Sarawak (JPBS) madah, semua aset enggau kereban bekaul semampai ulih dikena ninting maya nyema bisi penusah ngenyit nyadi.
Ba pekara bekaul, ripot ari Natural Resources and Environment Board (NREB) madah, bisi 23 iti palan mudah alai penusah nyadi naka ke diatu lalu bisi tujuh iti kes benung dipansik.
Nitihka NREB, pengawa nagang betunuka babas semampai diteritka lebih agi ba endur tanah kerapa baka di Kuala Baram kenyau bulan Mac tu tadi.
Bela datai maya nya, Menteri Pengangkut Sarawak ke mega Menteri Pengatur JPBB Miri Dato Sri Lee Kim Shin enggau Residen Sitak Miri ke mega Chairman JPBB Miri Galong Luang. -EDISI UKAS
