UNITED KINGDOM: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngetuai ke penemuai gawa ke Manchester enggau Dublin berengkah ari 2 nyentuk 5 Mei tu.
Penatai iya enggau delegit di Manchester pukul 1.15 dini hari, Hari Enam, jam menua nya ungkup misyen strategik ngentapka penuduk Sarawak ba rentayan makit global mungkur infrastruktur Palan Data, Teknologi ‘Artificial Intelligence’ (AI), Semikonduktor sereta pemansang penau tikas dunya.
Di Dublin, Premier Sarawak ditaga ngelawa Kampus Palan Data Strategik K2 nyengkaum Fasiliti DUB4 enggau DUB5 ke nyadi entara kedap ba operasyen palan data besai di Eropah.
Di Manchester, iya deka ngulu Program Sarawak Agenda-Townhall with YAB Premier Sarawak nyadi pelasar negapka rentayan kaul begulai Sarawak, kelimpah ngulu Pengerami Makai Lemai Lan Berambeh Anak Sarawak ke nyadi lambang penyerakup komuniti belelang.
Iya udah nya ditaga ngatur randau enggau pengari Perintah Kandang Menua Manchester di British Muslim Heritage Centre ngaul randau sereta kaul strategik kelimpah nanggam sempekat Surat Gawa Begulai (LOC) enggau Sempekat Pemereti Ati (MOU).
Di Bristol, Premier Sarawak ditaga ngulu Atur Gawa SMD Semiconductor begulai enggau University of Bristol sereta bekunsi penemu ba program nya.
Iya mega deka meda pengawa besilih dokumen MoU entara SMD Semiconductor enggau Bristol Research Group sereta Sempekat Semaya (MOA) entara SMD Semiconductor enggau Yayasan Sarawak.
Agenda ditampung enggau ngelawa National Composites Centre (NCC) sereta Fasiliti Superkomputer Isambard-AI nyadi lambang pengulih pansik enggau inovasyen tikas dunya ba bidang ngena komputer tinggi.
NCC nyadi palan pansik enggau pemansang komposit tikas dunya di UK ba bidang dikemerat baka komposit, injinjiring digital enggau pemeruan ti ngempung penemu pakar pemadu manah sereta teknologi pemadu maju dikena mantu mutar pemar injiniring pemadu beleman ba tikas global.
Nyempulang Premier Sarawak iya nya Sekretari Perintah Sarawak, Datuk Amar Mohamad Abu Bakar Marzuki, Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai), Datuk Sharifah Hasidah Sayeed Aman Ghazali enggau Sekretari Pekara Wang Sarawak, Dato Sri Wan Lizozman Wan Omar.
Ngambat penatai Premier Sarawak iya nya Tuai Sekretari Politik YAB Premier Sarawak, Dato' Fazzrudin Abdul Rahman, Direktor Yayasan Sarawak, Datu Mohamad Junaidi Mohidin sereta bala nembiak Sarawak sereta Sarawak Volunteers.-EDISI UKAS
