MANCHESTER: Inisiatif strategik Perintah Sarawak bekaul pemansang Artificial Intelligence (AI), kuasa gadung enggau sistem pengangkut moden nerima timbal ke manah peranak Sarawak ba menua bukai.

Tu bela dipeda nyadi peluang sida pulai sereta gawa ba menua diri nangkan tu ila.

Transformasyen ekonomi baru nya majak diasai nyentuk di menua bukai alai peranak sereta raban profesional nengeri Sarawak ba menua United Kingdom (UK) enggau Eropah bela madahka diri andal meda kuing tuju pemansang ke digaga Perintah Sarawak nya.

Siku ari nembiak pelajar ekonomi di University of East Anglia, Gabrielle Angelica madah, inisiatif Perintah Sarawak nya siti chara ke engkeman dikena mai Sarawak datai ba penuduk bela tikas enggau ekonomi antarabansa.

Ku iya, pekara nya ukai semina meri pengandal ngagai pemansang dudi hari nengeri tang bela diumba enggau pengingin diri pulai gawa sepengudah tembu belajar ila.

"Tu ngasuh aku gagit agi ati pulai ke Sarawak laban mayuh peluang ulih dikena nyungkak pengelandik sereta nyaup pemansang nengeri," ku iya maya dirandau UKAS enggau TVS ba Sarawak Agenda Town Hall 'Sarawak Towards The Future' serimbai Lan Berambeh Anak Sarawak 2026, UK Edition ditu, Hari Minggu.

Penemu ke sebaka bela dibantai siku nembiak pelajar ekonomi di University of Warwick, Aufa Abdul Hadi, ti meda inisiatif pengerembai ekonomi beguna bendar dikena ngurangka kelalu bepanggai ba petroleum.

Ku iya, pengeransing ngenegapka ekonomi nyengkaum pemansang hidrogen seriris enggau prinsip ekonomi moden ti ngemeratka macham pun penatai dikena nyeliahka penanggul bukai nyadi.

"Enti ekonomi majak mansang lalu pemeranak puku mega nambah, peluang gawa bela deka nambah ba macham sektor nyengkaum pekara wang enggau pemeranak puku," pia ku iya.

Siku injinia ba projek rel di United Kingdom, Esha Pierra Selamat Jati madah, pengawa ngaga sistem Autonomous Rail Transit (ART) di Sarawak nyadi chara ke engkeman dikena mutar penusah jalai sekut seraya nyungkakka tikas pengidup rayat.

Iya madah, peneras pemansang infrastruktur nya nyengala dipeda ti nyaup pemansang ke majak nyadi di Kuching.

"ART ukai semina nyendia sistem pengangkut ti lebih agi efisyen tang nyaup ngurang pengelama timpuh pejalai ke sebedau tu nyentuk sejam setengah," ku iya madah.

Kelimpah ari nya, siku arkitek asal ari Limbang, Esha Emmanuel Selamat Jati madah, inisiatif kuasa alternatif baka hidrogen ngerandang peluang inovasyen nyengkaum ngena kereban enggau teknologi baru.

Ku iya, bidang STEM mega deka meri empas ke manah ngagai sektor ke bukai ti bela ulih matak penatai pemeranak puku.

"Enti kitai mai teknologi enggau penemu baru, tu ukai semina numbuh mayuh agi kereja puang tang bela deka ngenegapka agi penuduk Sarawak ba ekonomi global," ku iya nerang.

Siku agi peranak Sarawak ke diatu gawa di Nottingham, Asrafizra Christine Theama Kunjang meda inisiatif perintah beguna bendar dikena nguna pengelandik luar nengeri nipak pemansang nengeri.

Ku iya, agi bisi peluang patut diisi peranak Sarawak di menua bukai ti ngembuan pengelandik enggau peneleba antarabansa.

"Inisiatif tu meri peluang ngagai kami lebih agi berati baka ni kami ulih nyaup taja ukai diau di Sarawak," pia ku iya.

Kelimpah ari nya, iya bela nimbal manah pengawa ngatur program Lan Berambeh Anak Sarawak ke dipeda nyadi pelasar ngempuru peranak Sarawak ari macham bengkah menua seraya ngenegapka agi kaul komuniti global.

Penemu nya bela disukung alumni University of Manchester, Amirruddin Ahmat ti madahka program nya ulih bekunsika pekara pemadu baru bekaul pemansang Sarawak ngagai nembiak ke nampung pelajar di menua bukai.

"Mayuh nembiak enda nemu nama ke nyadi di Sarawak. Program baka tu meri awak ngagai sida lebih agi meda peluang ke ulih mai sida mulaika diri gawa di menua udah tembu belajar ila," ku iya madah.-EDISI UKAS