KUCHING: Sarawak ngerumban reformasi sektor pengerai oral ari ngenegapka digitalisasi sistem pengerai, ngerembai akses perubat sereta ngenegapka sinergi perintah-peribit nentuka servis diberi sikar enggau inklusif agi.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg nyemetak madah, chara holistik nyaga pengerai oral dikemerat seriris enggau pejalai Langgur Pemansang Malaysia Lumpar Ke-13 (RMK-13).
“Manggai taun 2026 nyadi taun ngepunka Langgur Pemansang Malaysia Lumpar Ke-13 (RMK-13), kitai ngalih ngagai renggat perambu strategik ngagai renggat bejalaika pengawa ti meri asil nyata ba menua.”
Iya nyebut jaku nya nengah teks jaku dibacha Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah serimbai bejadika 14th Borneo Dental Congress & Trade Exhibition 2026 di Kuching kena Hari Lima.
Premier madah, sektor pengerai oral patut diberi perati laban lebih 3.5 bilion peranak dunya ditepan penyakit bekaul oral.
Iya mega madah ke pemesai guna sinergi entara sektor perintah enggau peribit dikena ngenegapka sistem pengerai nengeri.
“Aku pechaya ke sinergi entara sektor perintah enggau peribit endang beguna endar dikena numbuh ekosistem pengerai ti entap enggau teguh,” ku iya.
Ba pengawa ngerembaika akses perubat, iya madah ke perintah nengeri udah ngagihka RM50 juta dikena bejalaika Skim Bantu Pengerai Orang Tuai (SCHB) ke meri pemaik ngagai urung 100,000 orang tuai, nyengkaum perubat pesakit pulai hari ngena bantu mata duit nyentuk RM500 setaun.
Kelimpah ari nya, Sarawak ku iya, bela ngenegapka agenda digitalisasi ari bejalaika Sistem Pengatur Klinik Bepelasarka Remang (CCMS) beungkus RM10 juta, enggau 153 klinik pengerai diatu udah didigitalka.
“Kitai deka madah ke dunya: datai ke Sarawak ungkup berubat ngeli enggau bayam pemanah rampa kampung ujan sereta budaya kitai. Ungkus perubat ditu tetap kompetitif dibanding menua bukai ti enda ngachau kualiti,” ku iya.
Iya mega madah, servis mega dikerembai nengah inisiatif baka Mobile Dental Squad enggau program “Kampung Iru Ngeli” nentuka akses perubat datai ba menua pesisir.
Pengawa ngatur kongres nya diperati nyadi pelasar besai ngenegapka kerejasama profesional sereta nyungkak inovasyen sektor ngeli, seriris enggau juluk Sarawak nyadi pengemudi servis pengerai bisi kualiti di rantau tu.-EDISI UKAS
Pemberita: Lonney Jinab
Gambar: Mohammad Naseem Razali
