KUCHING: Komuniti ti mereti ke pengidup mansang tuai beguna endar dikena narak penyiru, mereti enggau bisi tanggungpengawa ngagai utai diguna orang tuai, seriris enggau penyampau tubuh raban nya majak nambah di Sarawak.

Sekretari Politik Premier Sarawak, Kho Teck Wan madah, nerima enggau mereti ke gaya ubah ba ulah orang tuai deka mantu nempa komuniti ti siru agi enggau inklusif.

“Kitai meseti mereti ke enti umur nyau lunggar, sida begunaka perati enggau sukung.

“Enti bisi penemu pekara tu, kitai enda jampat kusut runding, tang sedia mantu,” ku iya.

Iya nyebut jaku nya lebuh ngari ke Sapit Premier Sarawak ke mega Menteri Pengerai, Pengawa Berumah enggau Perintah Lokal Sarawak Datuk Amar Profesor Dr. Sim Kui Hian ba Program Nambah Penemu Pengerai Orang Tuai: Age Well with Growing Resilience and Cognitive Empowerment (GRACE) di Tropics City Kuching, kena Hari Enam.

Ku Kho, Sarawak disadang nyadi entara nengeri pemadu tumu nyapai status peranak mansang tuai di Malaysia, enggau menua pesisir deka bisi orang mansang tuai jampat agi laban bala nembiak pindah ke mengeri.

Iya mega madah, penyampau tubuh orang tuai mega meri empas ngagai pekara wang laban orang mayar chukai majak kurang, tang ungkus berubat pengerai majak niki.

Berindik ari nya, ku iya, Perintah Sarawak udah bejalaika sekeda inisiatif nyengkaum Kenyalang Gold Card (KGC) ti meri diskaun ba utai diguna besehari-sehari, servis farmasi enggau beperesa pengerai.

Kelimpah ari nya ku iya, perintah nengeri mega bejalaika Skim Bantu Pengerai Orang Tuai (SCHB) ari meri kredit ninting taun RM500 ngagai orang beumur 60 taun enggau tuai agi ti patut nerima ngambi ulih berubat pemun ba klinik luar enggau servis ngeli.

Berebak enggau nya, ku iya, tanggungpengawa nyaga orang tuai ukai semina bepanggai ba perintah aja, tang begunaka sukung semua raban.

Sama datai, Datuk Bandar Kuching Selatan Dato Wee Hong Seng.-EDISI UKAS