MUKAH: Pengelain raban bansa, pengarap enggau budaya di Sarawak majak nyadi pun ngetanka pengelantang rayat sereta nyukung agenda pemansang nengeri.
Sapit Premier Sarawak, Datuk Amar Awang Tengah Ali Hasan madah, rayat pupu bansa di nengeri tu tetap begempung enggau bekerejasama taja bebida tirai juru.
“Bida ti dikembuan kitai ukai penekul, tang nyadi pengering ti ngempung rayat Sarawak,” ku iya.
Iya nyebut jaku nya lebuh bejaku ngari ke Premier Sarawak Pengerami Bejadi Kaul enggau Keman Kaul 2026 di Taba Pengerami Kaul, Hari Enam.
Ku iya, pengelain ke nyadi identiti Sarawak patut majak dijaga laban nya nyadi elemen beguna nempa rayat ti tegap enggau mansang.
Iya mega mulai ke kenang jaku niang Tun Pehin Sri Abdul Taib Mahmud ke ngumbai Sarawak nyadi gempung anak sungai ti ila begempung nyadi arus besai.
Datuk Amar Awang Tengah madah baru, Kaul Mukah patut ditampung nyadi pelasar negap penyerakup rayat, kelimpah narak penyelai budaya lokal nyengkaum pemakai asal, pisin enggau krafjari.
Ba pengerami ke sama, iya mega bisi nyua pemeri RM50,000 ngagai Serakup Melanau Mukah dikena nyukung aktiviti serakup nya.
Seraya Chairman Komiti Besai Kaul Mukah 2026 ke mega ADUN Balingian, Abdul Yakub Arbi madah, Serakup Melanau Mukah (PMM) udah ngena chara baru ngatur Kaul Mukah.
Ku iya, pengerami nya diatur diubah ari semina ritual aja ngagai main asal tikas besai ti ngempung elemen asal enggau atur pengawa moden.
“Inisiatif tu ngaul pengawa bekenaka teknologi sereta ngemanah fasiliti nentuka pengawa ngatur berurun agi, dinamik enggau ngelantangka pengusung.
“Pengawa tu beguna endar nentuka Kaul Mukah tetap relevan sereta matak rebak biak enggau temuai antarabansa rindu datai sereta enda ngeruga nilai sejarah iya,” ku iya.
Iya mega madah, pengawa nya ngangkatka Kaul Mukah ukai semina pengerami ninting taun aja, tang pengerami besai ti nangkup standard atur pengawa tinggi.- EDISI UKAS
