PUSA: Kampung Triso nyadi keterubah endur ngetu Program Kembara D’ Astana ke mudik Sungai Sarawak.

Program kena Hari Enam nya meda Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau Toh Puan Datuk Patinggi Fauziah Mohd Sanusi mupuk bejalai ngundang rayat sereta kaban belayan di genturung pendiau nya.

Dulu ari nya, pejalai merau bekejang ari jelatung Terminal Penumpang Kuching, Pending ti nepan Katamaran Damai Princess sebedau datai di Kampung Triso.

Sekumbang mudik, raban nya dientudi bot interceptor Unit Pengelikun enggau Penerit Adat Sarawak (UKPS), Raban Polis Marin sereta Kaunsil Sungai-Sungai Sarawak nentuka pejalai lanchar enggau likun.

Bela nyempulang bala anak seduai, Sharifah Fariah enggau Sharifah Nong-Jasima begulai enggau laki diri, Muhammad Nur Hakeem, sereta Sekretari Mendam Kanan Yang di-Pertua Negeri Sarawak, Dato Sri Syed Hamzah Syed Paiee.

Penatai raban nya diambat peranak menua, lalu nya ngayanka pengerapit kaul ti semampai tegut entara bala tuai nengeri enggau komuniti renggat baruh.

Sekumbang pejalai nya, Tun Pehin Sri Dr Wan Junaidi enggau Toh Puan Fauziah mega bisi ngabas pendam Kampung Triso kelimpah ngelawa taba rumah lama ti ngundang mayuh sejarah enggau kenang lama.

Raban nya mega bisi limpang sembiang bebala mayuh di Masjid Al-Muhajirin Kampung Triso sebedau ngelimpangka awak diri berandau enggau peranak dia sereta merarau enggau sida sebilik sereta peranak menua.

Tun Pehin Sri Dr Wan Junaidi mega bisi nyuaka pemeri RM20,000 ngagai Masjid Al-Muhajirin kelai sukung ba pemansang institusyen pengarap menua nya.

Entara bala datai, Sapit Menteri Nembiak, Lumba enggau Pemansang Orang Dagang (Pemansang Nembiak enggau Lumba) ke mega Kaban Kunsil Nengeri (ADUN) Layar Datuk Gerald Rentap Jabu, ADUN Beting Maro Dato Razaili Gapor, Residen Bagi Menua Betong Datu Richard Michael Abunawas, Pegawai Pelilih Pusa Hamdan Katang, Temenggong Bagi Menua Betong Ayahanda Piee Alwi, sereta Tuai Kampung Triso Awang Mos Sulaiman.-EDISI UKAS

Gambar: Ibanez Jeffery Guang