48 Projek RMK12 Ngerumban Pemansang Mukah Nyadi Hab Ekonomi Baru
MUKAH: Sepenyampau 48 projek pemansang dipejalai nengah Langgur Pemansang Malaysia Lumpar Ke-12 (RMK12) udah ngerumban pengawa ngubah Mukah nyadi palan ekonomi baru tumbuh di Sarawak.
Sapit Premier Sarawak, Datuk Amar Awang Tengah Ali Hasan madah, ari penyampau nya, sebagi ari projek udah tembu seraya ke bukai benung digaga berenggat.
Ku iya, pemansang infrastruktur dikemerat enggau agih belanja ngelui RM4 bilion diberi ungkup projek ngaga jalai enggau jematan di Bagi Menua Mukah.
“Pengawa meranak puku besai tu beguna endar dikena nambah rentayan penyambung sereta meransang aktiviti ekonomi di menua tu,” ku iya lebuh ngari ke Premier Sarawak ba Pengerami Bejadi Kaul enggau Keman Kaul 2026 di Taba pengerami Kaul, Hari Enam.
Ngenang silik Datuk Amar Awang Tengah madah ke Mukah diatu ba penuduk strategik ngerembai nyadi hab digital enggau inovasyen, seriris enggau pemansang infrastruktur sereta negapka sektor pelajar.
Ku iya, institusyen ditumbuh baka Palan Penyulut Teknikal Sarawak (CENTEXS) enggau Universiti Teknologi MARA (UiTM) Pampang Sarawak Kampus Mukah nyadi penyungkak nempa pengereja pengawa landik.
Iya madah baru, Mukah mega bisi pengulih besai ba sektor betanam betupi moden enggau ekonomi biru, laban betimpai enggau tasik.
Ku iya, kelimpah industri berikan enggau akuakultur, menua nya mega bisi pengulih diserungkai ba pemansang sektor maritim, marin sereta kuasa ulih dikena baru baka kuasa umbak.
“Tu ngerandang peluang baru ngagai pemansang ekonomi ti meruan agi enggau ulih besemekih dudi hari,” ku iya.
Pengerami nya mega digulu Menteri Pemansang Indu, Nembiak Mit enggau Pengelantang
Komuniti Sarawak Dato Sri Fatimah Abdullah, Sapit Menteri Pengerai ke mega Kaban Parlimen Mukah Dato Hanifah Hajar Taib, Sapit Menteri Perambu Mengeri, Pengatur Tanah enggau Rampa Menua Datuk Len Talif Salleh, Sapit Menteri Infrastruktur enggau Pemansang Penyangkai Kapal (Pemansang Infrastruktur) Sarawak Datuk Ir. Aidel Lariwoo, Chairman Serakup Gerempung Melanau Sarawak Tan Sri Dato Sri Dr. Muhammad Leo Michael Toyad Abdullah, ADUN Balingian Abdul Yakub Arbi, ADUN Tellian Royston Valentine, ADUN Jepak Iskandar Turkee sereta temuai bukai.- EDISI UKAS
