KUCHING: Projek ngaga Palan Seni Pemerindang nengeri tu diatu lanchar lalu disadang tembu suku kedua taun 2027.

Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, taja bisi laun mimit ari taga asal, tang raban sida tepantup ati meda pejalai projek nya ke deka nyadi penyungkak ngagai pengawa ngatur program besai agi di Sarawak.

Ku iya, perengkaguna baru nya deka tetangkupka penyampau tubuh orang datai meda mayuh agi dibanding auditorium ke bisi diatu, kelimpah disikap sistem akustik ke lebih bekualiti.

“Pengawa ngatur mayuh program diatu nyau diatur di Dewan Undangan Negeri, Borneo Cultures Museum, lalu suah agi kitai ngatur ba palan bukai baka di Blessed Centre, Amphitheater enggau auditorium Kaunsil Mengeri Kuching Selata (MPKS).

“Nya alai, ari pemisi Palan Seni Pemerindang ila, program deka meruan agi enggau besai dibai kitai kia,” ku iya.

Iya nyebut pekara nya lebuh dirandau pemberita pengudah ngulu Pengawa Nutup ‘Born To Dance International Competition’ 2026, di Muzium Budaya Borneo, ditu, Hari Minggu.

Ngenang pejalai sektor dagang temuai nengeri, iya madah ke mayuh agi program diatur nyadi strategi beguna nentuka Kuching tetap nyadi mengeri ke dinamik sereta enda ngasuh ‘leju’.

“Ba aku, siti mengeri ti ngasuh kitai leju, nadai pemerindang, nadai penampak malam hari baka api neon deka enda ngait ati orang.

“Enti mengeri nya enda ngait ati, pengusung pen nyau kurang deka ngelawa. Nya kebuah, enti mengeri ny ulij diidup enggau bemacham aktiviti baka pemerindang, lumba enggau main, program pemakai enggau pengerami, iya tau matak mayuh agi pengusung datai sereta ngerichahka mengeri,” terang iya.

Iya mega madah, temuai ke datai ukai semina ngeranchakka sektor dagang temuai aja, tang meri ekonomi belimpah ngagai industri hotel, pemakai enggau servis lokal. -EDISI UKAS