Kembara D’Astana Ngetu di Lingga, Ngabas Pemansang Menua
LINGGA: Program Kembara D’Astana ditampung enggau ngetu di Pasar Lingga kena Hari Minggu, lalu nya meri peluang ngundang peranak menua nya.
Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi datai di Jelatung Pasar Lingga urung pukul 10.20 pagi.
Sida diambat Kaban Kunsil Nengeri (ADUN) Lingga Dayang Noorazah Awang Sohor, ADUN Bukit Begunan Datuk Mong Dagang, Residen Bagi Menua Sri Aman Mahra Salleh, Pegawai Pelilih Lingga Frank Lani enggau Pegawai Pelilih Sri Aman Shariff Bujang.
Lebuh datai dia, raban nya lalu ngelawa Dataran Lingga ungkup begambar sebedau nampung program di Dewan Masjid Al-Hana Lingga.
Sekumbang dia, Tun Pehin Sri Dr. Wan Junaidi enggau Toh Puan Fauziah limpang ngelawa kaunter pemandang enggau nyain gambar ex-Temenggong Abang Bohari Abang Zen sebilik kelai ngenang pesaka sejarah menua nya.
Ba jaku pengelalu, Dayang Noorazah madah ke Lingga dipilih nyadi siti ari endur ditapat Kembara D’Astana ketegal nilai sejarah enggau signifikan menua nya ngagai Yang di-Pertua Negeri Sarawak.
Ku iya, program nya inisiatif Tun Pehin Sri Dr. Wan Junaidi empu mudik sungai berengkah ari Kuching ke Triso enggau Sebuyau sebedau datai di Lingga.
Iya mega madah, peneleba Tun Pehin Sri Dr. Wan Junaidi nyadi Kaban Parlimen Batang Lupar ari taun 1990 nyentuk 2004 meri peluang ngagai iya meda empu ubah pemansang Lingga ke diatu udah ngerembai ari pelilih mit ngagai pelilih menua.
Program nya richah enggau meda video pandak asil pansik bala pemansik ari Universiti Teknologi Mara (UiTM) Kota Samarahan pasal Perintah Lingga-Banting, ke nyadi sebagi ari sejarah tumu perintah ditumbuh ba menua nya.
Ba pengerami ke sama, ex-Temenggong Abang Bohari nyuaka manuskrip pesaka ngagai Tun Pehin Sri Dr. Wan Junaidi ungkup pengawa ngintu keresa sejarah menua.
Bela diatur pengawa nyua ke replika chek bernilai RM20,000 ari raban Astana Negeri Sarawak ngagai Masjid Al-Hana Lingga.
Program udah nya ditampung enggau pengawa merarau begulai enggau peranak menua sebedau raban sida mupuk pulai pukul 12.30 tengah hari.
Sama datai, Penyanding Penemu ba Opis Premier Sarawak Datuk Amar Jaul Samion.-EDISI UKAS
