SRI AMAN: Raban bansa lebih agi ba rumah panjai diperansang terus ngetan enggau ngintu budaya Iban lebih agi rebak baru.
Kaban Kunsil Nengeri (ADUN) Bukit Begunan, Datuk Mong Dagang madah, pengawa nya beguna endar nentuka adat enggau identiti raban bansa seruran dijaga lalu enda lenyau diserunyut jeman.
“Tetiap rumah panjai patut seruran ngetan enggau ngintu budaya Iban ngambi pesaka aki ini kitai seruran idup ba rebak biak,” ku iya lebuh bejadi Program Tuai Enggau Rayat serimbai Mantar Gawai 2026 di Rumah Dumy, Gua Dalam, ditu, Hari Enam.
Kelimpah ari nya, Datuk Mong mega madah, pengerami Dayak Dayak patut dikena raban bansa Iban ngerapitka agi kaul entara diri sebilik enggau kaban belayan.
Ku iya, hari besai Gawai Dayak ukai semina pengerami pengudah tembu ngetau aja, tang awak pemadu manah diri sebilik begelumu, betunga enggau ngerapitka agi kaul diri sama diri kelimpah ngundang kaban belayan enggau diri serumah.
Serimbai Gawai Dayak ke deka datai, iya ngelalau mensia mayuh bekelimat ngena belanja sereta meli utai diguna aja dikena ngintu hari besai lebih agi belanja idup diatu niki ketegal ekonomi enda tegap.
Iya mega ngemendarka agih belanja Projek Mit Pemansang Menua Pesisir (MRP) sepenyampau RM12,000 ngagai Komiti Pemansang enggau Pengelikun Genturung Pendiau (JKKK) Rumah Dumy, RM5,000 ngagai Biro Indu Rumah Dumy, RM8,000 ngagai JKKK Rumah Kunie, Gua Sukat sereta RM3,000 ngagai Biro Indu Rumah Kunie, Gua Sukat. -EDISI UKAS
