MIRI: Pengelebih ti dikembuan mengeri Miri ke bisi rayat pupu bansa, jalai pengarap enggau budaya nentuka menua nya nyadi palan engkeman alai ngatur Gawai Dayak enggau Festival Ethnocultural.

Sapit premier Sarawak, Datuk Amar Douglas Uggah Embas madah, tu bela mandangka penegap enggau pemanah kaul sereta pengelantang pengidup ti nyadi identiti Sarawak.

Ku iya, mengeri Miri dipilih alai ngatur pengerami nya seriris enggau pengeransing deka meda timbal ke manah ari rayat mayuh ari luar Kuching kelimpah meri peluang ngagai rayat menua utara nengeri tu bela ngerichah pengerami.

"Semangat Segulai Sejalai berupai dipeda nengah kerejasama rat gerempung ukai dikuasa perintahh (NGO) ke besaup ngatur pengerami tu," ku iya madah.

Iya bejaku munyi nya maya bejadika Gawai Dayak Baazar enggau Ethnocultural Festival serimbai Pengerami Gawai Dayak Renggat 2026 di Bandar Baru Permyjaya ditu, Hari Satu tu tadi.

Bekaul Festival Ethnocultural, iya madah, pengerami nya mai reti ke chukup besai ukai semina mandangka tanda enggau ngepan lama tang bela bisi reti ba gaya pengidup, sejarah enggau identiti rayat pupu bansa.

Ku iya, main lama baka ngajat, ajat Orang Ulu, tenun sereta pemakai lama nyadi pesaka ke tau diangkat nyaup ekonomi nengeri.

"Daya idup lama tu bela tau nyadi pun penatai ekonomi lalu dikemegah nyentuk renggat global," ku iya madah baru.

Kelimpah ari nya, iya mega madah, Bazar Gawai bela meri peluang ngagai orang dagang nambah penatai pemisi sida seraya nyadi pelasar pelajar budaya ungkup rebak baru.

Iya andal, juluk ati deka bulih asil RM1.8 juta ulih dipenyadi enti dibanding RM1.3 juta ke udah dirikod di Kuching sebedau tu maya pengerami nya.

Bela datai maya nya, Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom, Menteri Pengangkut Sarawak Dato Sri Lee Kim Shin, Menteri ba Opis Premier Sarawak Dato Sri John Sikie Tayai, Sapit Menteri Pengerai Mensia Mayuh, Pengawa Berumah enggau Perintah Kandang Lokal ke mega Chairman Komiti Pengatur Pengerami Gawai Dayak Renggat Sarawak 2026 Datuk Dr Penguang Manggil, Sapit Menteri Infrastruktur enggau Pemansang Penyangkai Kapal Sarawak ke mega Chairman Komiti Mit Gawai Dayak Bazaar enggau Ethnocultural Festival Renggat Sarawak 2026 Datuk Majang Renggi sereta temuai dipebasa ke bukai.- EDISI UKAS