KUCHING: Sarawak chakah deka nyadi hub meranak puku gadung enggau ekonomi moden pemadu nyulut di ASEAN nengah pengawa nempa kerejasama strategik enggau Jerman, lebih agi ba sektor beresi, semikonduktor enggau ekonomi digital.
Sapit Premier Sarawak, Datuk Amar Awang Tengah Ali Hasan madah, forum dagang Malaysia-Jerman ukai semina pelasar betemu tang ngelai pemanah kaul sereta pengeransing nempa pemujur industri dudi hari, inovasyen enggau pemansang meruan.
Iya madah, Jerman udah nyulut ba renggat global ba injiniring enggau kilang moden lalu Sarawak bisi pun penatai pengeraja asal sereta kuing tuju pemansang ke nyengala ke ulih nyadi menua ekonomi bepenatai pemisi besai bepelasarka inovasyen manggai taun 2030.
"Kitai napi penanggul global nyengkaum geopolitik, bekal pemakai enggau ungkus kuasa ke majak niki.
"Tang penanggul tu meri awak ngagai Sarawak nyadi menua nyulut ke ditapat pemeranak puku, puh sereta kompetitif di rantau ASEAN,” pia ku iya.
Iya bejaku munyi nya maya Forum Dagang Malaysia-Jerman Ke-6 (GMBF) ditu, Hari Tiga.
Iya ke mega Menteri Dagang Antarabansa, Industri enggau Pemeranak Puku Sarawak madah, transformasyen ekonomi nengeri dipejalaika nengah tiga batang sektor iya nya ekonomi digital, kuasa ulih dikena baru enggau kilang moden.
Iya madah, Sarawak diatu ransing nyungkakka agenda Industri 4.0 nengah teknologi Artificial Intelligence (AI), automasi enggau teknologi pintar.
Ba sektor kuasa gadung ku iya, Sarawak ngembuan juluk ati ngasilka kuasa manggai 10 gigawatt ba taun 2030 ti mungkur hidroelektrik, hidrogen, bioenergi, teknologi ‘waste-to-energy’ enggau minyak bilun.
"Kelimpah ari nya, Sarawak chakah ngemansangka pengawa bekaul semikonduktor, aeroangkasa enggau teknologi baru," ku iya nerang.
Datuk Amar Awang Tengah madah, semua pekara nya seriris enggau pengering industri ke dikembuan Jerman lalu Sarawak bisi juluk ati nyadi menua baka Bavaria ti nyulut ba industri di Eropah.
"Beberapa iti kompeni ari Jerman baka X-FAB enggau Behn Meyer mega udah bejalaika pengawa sida di nengeri tu," pia ku iya.
Awak nya bela dikena iya ngelaluka kompeni Jerman bekerejasama ba pemansang hidrogen di Bintulu, sistem pengangkut gadung di Kuching, ekonomi digital, automasi industri, Internet of Things (IoT), ekonomi idar enggau rampa menua.-EDISI UKAS
