MIRI: Perintah Sarawak deka nyaup agensi ba Komiti Pengatur Penusah Ngenyit Sitak (JPBB) Miri bekaul aset dikena napi El Niño ke disadang ngepunka musim kemarau berengkah Jun ngagai Ogos tu.

Sapit Premier Sarawak Datuk Amar Douglas Uggah Embas madah, Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah besetujuka pekara nya nyengkaum ngungkupka agih belanja.

"Kitai deka berati ungkus dikena meli nyengkaum pekara ngadu kereban dikena nentuka pengawa bekaul ulih dipejalaika enggau mujur," ku iya maya betuaika Aum JPBB Sitak Miri Musim Kemarau enggau Penusah Angus Tanah Kerapa ditu, empai lama.

Dulu ari nya iya ke mega Chairman Komiti Pengatur Penusah Ngenyit Nengeri Sarawak (JPBNS) mendingka penerang ari agensi bekaul senentang El Niño.

Maya nya, pengari Opis Bomba enggau Penyah Penusah Malaysia (JBPM) madahka sida begunaka aset tambah baka hos enggau pengangkut ai lebih agi dikena maya penusah angus nyadi.

Bela datai maya nya Menteri Pengangkut Sarawak Dato Sri Lee Kim Shin, Sapit Menteri Infrastruktur enggau Pemansang Penyangkai Kapal Sarawak Datuk Majang Renggi, Sapit Menteri ba Opis Premier Sarawak (Pengereja Kasar, Imigresen enggau Matau Projek) Datuk Gerawat Gala, Sapit Menteri Pengerai Mensia Mayuh, Pengawa Berumah enggau Perintah Lokal Sarawak Datuk Dr Penguang Manggil, Sapit Menteri Dagang Temuai, Industri Kreatif enggau Seni Pemerindang Sarawak Datuk Sebastian Ting Chiew Yew, Sapit Menteri Luar Nengeri ke mega Kaban Parlimen Sibuti Dato Lukanisman Awang Sauni, Kaban Kunsil Nengeri (ADUN) Pujut Adam Yii Siew Sang enggau Residen Sitak Miri Galong Luang. -EDISI UKAS