BINTULU: Bisi 1,681 iku penerima bantu Sitak Bintulu nerima pemeri khas serimbai Program Sejambak Kasih Hari Gawai 2026.
Sapit Menteri Infrastruktur enggau Pemansang Penyangkai Kapal Sarawak Datuk Majang Renggi madah, program ke diatur Opis Pengintu Pengelantang Mensia Mayuh (JKM) nya diatur dikena nyaup sida ke beguna bantu nyengkaum B40 enggau orang tuai ngelempung belanja nyambut Gawai Dayak taun tu.
"Pemeri tu mungkur belanja manggai RM161,100," pia ku iya maya pengawa nyua pemeri nya ditu, Hari Dua.
Iya ke mega Kaban Kunsil Nengeri (ADUN) Samalaju madah, bantu nya dikeandal ulih nyaup ngelempungka agi tating belanja penerima lebih agi maya ungkus pengidup majak mar diatu.
Kelimpah ari nya, Datuk Majang madah, Sitak Bintulu bisi 2,843 iku penerima bantu ninting bulan ba April 2026 tu aja ti begunaka ungkus manggai RM1.24 juta.
"Ari Januari nyentuk April taun tu, penyampau semua bantu urung RM5 juta," ku iya nerang.
Maya nya, iya mega beterima kasih ngagai PETRONAS ke udah meri bantu ba macham inisiatif pengintu pengelantang.
Awak nya bela dikena Datuk Majang ngelalau mensia mayuh bela ngemeratka pengelikun diri maya pulai ke menua nyambut Gawai Dayak.
Pengawa sehari nya bela digulu Manijer Besai PETRONAS Sarawak, Norazibah Md Rabu, Pegawai Pelilih Bintulu, Awang Mohammed Nizam Awang Ali Bolhan enggau Pegawai Pemansang Mensia Mayuh, Jemat Kanchin.-EDISI UKAS
