KUCHING: Gerempung Berita Nasional Malaysia (Bernama) deka ngenegap kerejasama strategik enggau Unit Komunikasi Awam Sarawak (UKAS) nengah pengawa nyaup nyendia pengelandik bekaul pemberita lebih agi nyerumba Lumba SEA 2027 enggau Pengawa Bepilih Nengeri (PRN) tu ila.

Tuai Pegawai Eksekutif Bernama, Datin Paduka Nur-ul Afida Kamaludin madah, penemuai basa ngagai UKAS nyadi pelasar beguna dikena nyintalka agi kaul ke endang udah bisi seraya nyidi peluang ulih nempa kerejasama enggau pangan diri.

Ku iya, Bernama ngembuan pengelandik ba pengawa pemberita nyengkaum baka maya Lumba Malaysia (SUKMA) di Sarawak taun siti tadi.

"Peneleba kami ngatur palan media antarabansa baka maya ASEAN enggau program besai menua ke bukai ngelama tu mega tau dikunsika kami," ku iya madah.

Iya bejaku munyi nya maya penemuai basa ngagai Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol ba Indu Opis UKAS ditu, Hari Dua.

Iya madah, penemuai basa nya bela dikena berandauka macham pekara nyengkaum bekaul kus ungkup pemberita di Sarawak enggau program bukai ti begunaka kerejasama UKAS enggau Perintah Sarawak.

Iya enggau nya ngarapka kerejasama nya ulih dipenyadi ba renggat ke tinggi agi nangkan tu ila. -EDISI UKAS

Pemberita:Ahmad Daniel Faiz
Gambar: Ibanez Jeffery