UKAS Sedia Besaup Enggau Bernama Maya Lumba SEA, PRN
KUCHING: Unit Komunikasi Awam Sarawak (UKAS) sedia deka besaup enggau Gerempung Berita Nasional Malaysia (Bernama) lebih agi maya Lumba SEA 2027 enggau Pengawa Bepilih Nengeri (PRN) nangkan tu ila.
Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol madah, kerejasama strategik nya beguna dikena nentuka pengawa ngenatai berita mujur agi.
Ku iya, peneleba ke dikembuan Bernama ke nyadi agensi media nasional tau dipedua nengah latih enggau woksyop ngagai pemerita lebih agi maya ngaga berita program besai baka Lumba SEA.
"Tu diumba kitai deka ngatur Lumba SEA nangkan tu ila lalu kitai enda nyalam, amat UKAS kala ngatur media maya SUKMA sebedau tu suba tang Lumba SEA bisi bida.
"Nya alai, kami beterima kasih ngagai Bernama ke deka ngatur program bekunsika peneleba enggau penemu ngambika raban UKAS lebih agi besedia maya Lumba SEA diatur ila," ku iya madah.
Iya bejaku munyi nya maya dirandau media sepengudah penemuai basa Bernama ba Indu Opis UKAS ditu, Hari Dua.
Iya mega madah, kerejasama nya ukai semina bekaul lumba aja tang bela ngira ngaduka ripot berita maya pengawa bepilih sereta program bukai nangkan tu ila.
Ku iya, kerejasama dua iti agensi nya bela besai reti ketegal ngira Sarawak menua ke besai sereta enda muntang dilawa pemberita.
Datuk Abdullah mega andal, peneleba ke dikembuan Bernama maya lumba betikas besai di Kuala Lumpur enggau menua bukai ulih dikena sereta pulaika pemaik ngagai UKAS ngaduka berita ti lebih agi efisyen.
"Pemberita ulih ngambi bagi ba kus, latih tauka woksyop begulai enggau raban media ari Sarawak ukai semina UKAS ngambika nemu agi chara gawa enggau ngaga ripot Lumba SEA ke deka diatur di Sarawak," ku iya madah baru.
Kelimpah Bernama, iya madah, UKAS mega deka besaup enggau media ke besai agi baka RTM enggau agensi ke bukai ba pengawa ngatur palan media sereta penatai pemberita menua bukai nyengkaum ba pekara logistik baka endur diau, perengkaguna, endur gawa, bungkur internet, perengka pengangkut sereta ke bukai.
Iya madah, pekara tu meseti dipelajar UKAS tauka opis menteri bekaul nengah agensi ke bisi peneleba ngatur lumba besai sebedau tu.
Sama bisi datai maya nya, Tuai Pegawai Eksekutif Bernama Datin Paduka Nur-ul Afida Kamaludin, Tuai Pengarang Bernama Arul Rajoo Durar Raj, Tuai Pengatur enggau Pekara Wang Bernama Sharifah Zaini Syed Zain, Tuai Opis Komersial Bernama Mastura Hassan enggau Tuai Biro Bernama Sarawak Ammar Syafiq Hamzah. -EDISI UKAS
