UNIMAS Dipadu Nyadi Palan Latih Kompetensi Gas Enggau Karan
KOTA SAMARAHAN: Universiti Malaysia Sarawak (UNIMAS) dipadu nyadi palan latih enggau peresa kus pengelandik gas enggau karan, lalu nyaup nyungkak pemansang orang gawa bepengelandik menua tu ba sektor utiliti strategik nengeri.
Menteri Utiliti enggau Telekomunikasyen Sarawak, Dato Sri Julaihi Narawi madah, basa ke diberi nya nyadi siti pekara ke besai reti ba pengawa nentuka sektor gas enggau karan diputar enggau likun, profesional sereta ulih besemekih.
Ku iya, sektor gas bekaul rat enggau pemansang industri, pemeranak puku sereta pengelantang rayat.
"Gas tu aset strategik ke bisi kaul enggau tiga bengkah pekara tu," pia ku iya.
Iya madah munyi nya nengah teks ke dibacha Sapit Menteri iya, Datuk Liwan Lagang maya Pengerami Nyua Setipikit Akreditasi ba UNIMAS ditu, Hari Dua.
Iya mega madah, sektor nya begunaka tikas disiplin profesional enggau kompetensi teknikal dikena nentuka pengelikun enggau integriti sistem semampai dijaga.
Berebak enggau nya, iya madah, pemansang orang gawa kompetan nyadi pugu pengulih enggau pemujur bejalaika polisi enggau perambu strategik nengeri.
"Polisi tu ulih dilangkar lalu infrastruktur mega ulih digaga, tang enti nadai orang gawa kompeten, semua tu enda mujur," ku iya madah baru.
Pengerami ke diatur sehari nya mandangka pengeransing Perintah Sarawak nyungkakka sektor utiliti nengah pemansang modal mensia betikas tinggi seriris enggau tuju strategik Sarawak Gas Roadmap sereta tuju pemansang ekonomi nengeri manggai taun 2030.
Bela datai maya nya Sapit Menteri Kuasa enggau Pemeruan Rampa Menua Sarawak Datuk Dr Hazland Abang Hipni, Chairman Komiti Direktor UNIMAS Tan Sri Datuk Seri Panglima Sulong Matjeraie, Mandal Canselor UNIMAS Profesor Dr Ahmad Hata Rasit enggau Sapit Sekretari Mendam Opis Menteri Utiliti enggau Telekomunikasyen Sarawak Syed Mohamad Fauzi Shahab. -EDISI UKAS
