BRISTOL: Perintah Sarawak nengah SMD Semiconductor berati pengulih nempa kerejasama strategik enggau raban di United Kingdom (UK) dikena ngaga chip semikonduktor betikas global, sistem teknologi satelit lalu deka ngamatka juluk ati ngelanchar satelit keterubah.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, tu kelai singkang besai Sarawak deka nyadi menua nyulut ba sektor semikonduktor global, aeroangkasa enggau teknologi angkasa.

Iya madah, inisiatif nya deka ngenegapka agi pengeransing Sarawak ngena satelit, analitik data enggau pemansang aplikasyen ili ti deka meri pemaik ngagai dunya lebih agi bekaul klimet baka kampung, rampa menua, ngatur penusah ngenyit, karbon enggau matau maritim.

"Dikena nyukung pengeransing tu, kitai deka nyerungkai pengulih ngemansang enggau ngelanchar satelit Low Earth Orbit (LEO) diri empu begulai enggau bakih antarabansa nyengkaum UK ti deka nyungkakka pengulih data sereta ngemansang infrastruktur telekomunikasyen lebih agi di menua pesisir.

"Ba pekara tu, pengelandik University of Bristol ba injiniring aeroangkasa enggau teknologi satelit nipak juluk ati Sarawak tu," ku iya madah.

Iya bejaku munyi nya maya program begulai Semikonduktor Sarawak ke diatur SMD Semiconductor enggau University of Bristol di NCC ditu, Hari Dua.

Premier Sarawak madah, Sarawak mega ransing ngerembaika penemu ba aeroangkasa, teknologi satelit enggau sistem bepelasarka data ti nyadi sebagi ari agenda teknologi moden.

Ku iya nerang, pengulih tu beguna ketegal teknologi dudi hari bepanggai ba integrasyen chip, satelit enggau sistem ngena Artificial Intelligence (AI).

Program sehari nya digulu lebih 80 penengkebang polisi, raban pemansik enggau raban bepengelandik industri ari selampur UK ti bela ngenegapka agi kerejasama strategik ba bidang semikonduktor, aeroangkasa, teknologi angkasa enggau sistem bepelasarka data.

Batang program berambaika jaku “Semiconductors Enabling Future Technology” betuaika Profesor Martin Kuball, Direktor Akademik enggau Tuai Projek University of Bristol (REWIRE) sereta Tuai Pegawai Eksekutif SMD Semiconductor, Shariman Jamil.

Maya nya bela diatur pengawa besilih dua dokumen iya nya Sempekat Pemereti Ati (MoU) SMD Semiconductor, University of Bristol enggau Yayasan Sarawak sereta Sempekat Semaya (MoA) enggau Yayasan Sarawak.

Kelimpah ari nya nya, siku injinia SMD Semiconductor dipadu nyadi siku ari kohort keterubah program PhD ba pengelama empat taun di University of Bristol ke dipelanja Yayasan Sarawak dikena nyukung pemansang pengelandik ba teknologi moden.

Program nya tebuka ngagai nembiak Sarjana Injiniring kelas nyulut ari selampur dunya lebih agi ungkup rayat Sarawak nyerumba pengeransing ngemansangka ekosistem semikonduktor nengeri.

Delegit Sarawak maya nya bela dibai meda perengkaguna superkomputer Isambard-AI, ti nambah penemu bekaul komputer betikas tinggi enggau AI dikena ngerumban agi pengawa ngulih asil saintifik enggau industri lalu berati pengulih kereban nya dikena di Sarawak.

Bela datai maya nya, Sekretari Perintah Sarawak Datuk Amar Mohamad Abu Bakar Marzuki, Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai) Datuk Sharifah Hasidah Sayeed Aman Ghazali, Sekretari Pekara Wang Sarawak ke mega Chairman SMD Semiconductor, Dato Sri Wan Lizozman Wan Omar enggau Sapit Sekretari Perintah Sarawak (Pengatur enggau Pemansang) Dato Sri Dr Muhammad Abdullah Zaidel.-EDISI UKAS