Ari Bristol Ke Sarawak: Data, AI & Kuasa Nyadi Formula Ekonomi Baru
BRISTOL: Sarawak majak ngayanka pengeransing deka nyadi hab ekonomi bepelasarka data enggau Artificial Intelligence (AI) serantau nengah pengelebih ngembuan kuasa ulih dikena baru sereta ngerembaika agi kerejasama strategik begulai enggau University of Bristol.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, penemuai gawa ngagai United Kingdom lebih agi di Bristol nengkebang peluang baru ba pemansang industri dudi hari ti bekaul AI, aeroangkasa enggau pengulih bekenaka komputer betikas tinggi.
"Tadi kitai bisi berandau enggau University of Bristol bekaul beberapa sektor ba industri aeroangkasa enggau kuasa komputer ke bisi ba universiti tu dikena ngaduka pansik bekaul pemansang dudi hari industri AI enggau industri aeroangkasa," ku iya.
Iya nerangka pekara nya maya dirandau UKAS enggau TVS sepengudah program begulai enggau Semikonduktor Sarawak ke diatur SMD Semiconductor enggau University of Bristol di NCC, Bristol, Hari Dua tu tadi.
Kelimpah ari nya, iya madah, pengawa bekenaka data nyadi pugu ekonomi baru ke diatu endang enda ulih diseliah ari ke dikena.
"Tu senutuk enggau pengeransing kitai deka ngena data ke nyadi pugu ngerembaika agi ekonomi baru lalu ba randau kitai tadi, kitai meda nadai chara bukai ngelawa pemansang dudi hari tu.
"Kitai enda ulih enggai ngena teknologi moden dikena nyungkakka agi pengulih sereta nambah tikas pun penatai ke endang udah bisi nengah teknologi ngambi imej enggau data," ku iya madah baru.
Bekaul pekara nya ku iya, Sarawak nengah SMD Semiconductor deka ngenegapka agi kerejasama pengawa mansik nyengkaum ba bidang tikas besai baka quantum AI enggau aeroangkasa.
Premier Sarawak mega madah, penemuai gawa maya nya bela nambah penemu senentang pengulih superkomputer betikas besai ke nyadi pugu pemujur ekonomi data moden.
"Sida bela ngena 3.5 megawatt sejam ke dikena urung 5,000 GPU di United Kingdom," ku iya nerang.
Iya madah, Sarawak ngembuan pengelebih ba kuasa ulih dikena baru ti nyendia ungkus operasyen ti lebih agi kompetitif enti dibanding enggau menua mansang, lalu ngerandang agi awak Sarawak ulih nyadi palan pemansik enggau ngadu data serantau.
"Enti dikira ari ungkus endang sigi besai, nya alai, kitai ulih bekerejasama enggau sida, kitai ulih ngena chara di nengeri kitai bekaul kuasa ulih dikena baru ngena ungkus kitai empu.
"Enti kitai nyendia ungkus ke lebih agi mimit bekaul bekal kuasa, kitai ulih nyadi palan pengawa mansik di rantau tu," pia ku iya. -EDISI UKAS
