MIRI: Pengawa ngatur Pekit Karaoke Lagu-Lagu Dayak serimbai Gawai Dayak Bazaar enggau Ethnocultural Festival nyadi pelasar ke engkeman nyaga sereta ngetan seni muzik etnik di Sarawak.
Inisiatif nya ukai semina dikena beperindang aja tang bela meri awak ngagai raban nembiak mandangka pengelandik diri.
Kaban Kunsil Nengeri (ADUN) Pelagus, Wilson Nyabong Ijang madah, pekit ke nerima timbal ti chukup manah nya ngelai pengerindu ba muzik Dayak.
"Program baka tu ukai semina dikena kitai beperindang aja tang tau nyadi pelasar dikena ngangkatka pengelandik lebih agi rebak baru ba seni enggau pemerindang," ku iya madah.
Iya bejaku munyi nya maya bejadika pekit nya ke diatur ditu, Hari Dua tu tadi.
Pekit nya digulu 15 iku penyereta ti ngarika menua nyengkaum Julau, Marudi, Serian, Miri, Sri Aman, Limbang, Lawas, Kanowit, Baram, Batu Niah, Betong enggau Bintulu.
Gela champion diempu Sapphira Felix ari Kuala Tutoh, Suai Niah ti nyadaka lagu ‘Pengidup Aku’ lalu mai pulai perais mata duit RM2,000.
Penuduk lumur dua diempu penyereta ari Limbang, Wayner Mclynold Mathew ke mai lagu ‘Siti Sumpah Siti Janji’.
Lagu ‘Ukai Peminta Tua’ ti disada Feddolyn Seredim ari Julau ngempu penuduk lumur tiga.
Seduai bela mai perais mata duit RM1,500 enggau RM1,000.
Perais pemenang mega disempulang trofi enggau setipikit.
Kelimpah ari nya, lagu 'Anang Buai Batu' mai tuah ngagai Wellyes Cheluday ari Kanowit ke dipadu ngempu Anugerah Pemerindang Pemadu Nyulut.
Wayner Mclynold Mathew sekali agi niki panggau nerima perais Anugerah Sada Nyawa Pemadu Nyulut.
Seduai mai pulai perais mata duit RM500. -EDISI UKAS
