LIMBANG: Kerejasama rat entara Perintah Besai enggau Perintah Sarawak terus nyadi penyungkak besai negap agenda pelajar menua pesisir nentuka akses pelajar bekualiti ulih diasai ke rayat.

Menteri Pelajar, Fadhlina Sidek madah, penegap politik ba renggat Perintah Besai enggau nengeri nentuka bemacham inisiatif pelajar dipejalai nemban agi, kelebih agi ngaul pemansang infrastruktur sekula, belajar digital sereta pengelantang nembiak enggau pengajar.

Ku iya, perintah keran nentuka tetiap polisi pelajar ulih dikemansang nyentuk renggat baruh ngambi pemaik nya ulih diasai ke komuniti menua pesisir.

"Nengah perintah ti tegap, kitai ulih nentuka bemacham pemaik enggau bantu ulih diagih terus ngagai rayat," ku iya lebuh Program Tindak Susul Parlimen (TSP) Siri 1 Taun 2026 di SK Limpaku Pinang, kena Hari Lima.

Ba program nya, sepenyampau RM272,875.50 diagih ungkup pengawa nyeruri kuarters, nyeruri prasekula enggau nyeruri tangki ai sekula nya.

Pia mega, siti smart board diberi Yayasan Guru Tun Hussein Onn seraya 20 unit tablet diberi Yayasan Didik Negara dikena nyukung pengawa nembiak belajar digital.

Sepenyampau RM10,000 mega diagih nengah Program Sukung Profesional Polisi Pelajar Digital dikena negap penau pengajar ngena teknologi ba bilik kelas.

Berebak enggau nya, 33 set sukung sekula mega diberi ngagai nembiak ti patut dikena nentuka sida enda dikelaung ari arus pemansang.

Iya mega meri terima kasih ngagai Perintah Sarawak ke pengeransing semampai nyukung pemansang pelajar sereta nentuka anak di nengeri tu bulih akses pelajar ti manah agi nadai ngira endur.

Sama datai, Sapit Menteri Pengangkut ti mega Kaban Parlimen Limbang, Datuk Hasbi Habibollah, Sapit Direktor Pelajar Malaysia (Sektor Operasyen Sekula), Zainal Abas enggau Sapit Residen Bagi Menua Limbang, Marie Cotilla Louise. -EDISI UKAS