KUCHING: Undang-undang, atur enggau prosedur ke diatu patut diperati sereta diseriris setipak enggau pemansang teknologi digital enggau 'Artificial Intelligence' (AI) dikena nyukung tranformasyen administrasyen sereta guna pemansang maya tu di Sarawak.

Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar madah, pekara nya dikena nentuka sistem administrasyen perintah semampai relevan, sikar sereta ulih nipak ubah teknologi.

"Ba dunya teknologi digital enggau AI, undang-undang, atur enggau prosedur ke bisi diatu patut diperati baru sereta diserenih ngambika ulih nyukung pemansang," ku iya.

Iya madah ke pekara nya maya pengawa ngepun Aum Keterubah Bagi Penggal Kelima Aum Kunsil Nengeri (DUN) Sarawak Ke-19 ditu, Hari Satu.

Tun Pehin Sri Dr Wan Junaidi madah, pengawa administrasyen ke manah, efisyen sereta sistematik nyadi pugu nentu pemujur bejalaika polisi enggau pemansang nengeri.

Ku iya, sistem kereja perintah meseti disungkak manah ngambi lebih agi sikar, laju sereta tetitihka pemansang maya hari.

Iya enggau nya madah, orang kereja perintah ba semua renggat nyadi pun pemujur ngatur semua polisi enggau inisiatif perintah.

"Aku minta semua orang kereja perintah nengeri tu ngambika semampai ngembuan ulah 'sense of urgency' enggau 'sense of ownership' dikena nentuka tuju pemansang perintah ulih dipenyadi nitihka langgur sereta dikemujur enggau manah," ku iya madah baru.

Bela datai maya nya bini Yang di-Pertua Negeri Sarawak Toh Puan Datuk Patinggi Fauziah Mohd Sanusi, Datuk Patinggi Abang Zohari, Speaker DUN Sarawak Tan Sri Datuk Amar Mohamad Asfia Awang Nasar, raban Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, bala Kaban Kunsil Nengeri (ADUN) sereta bala tuai opis perintah. -EDISI UKAS

Pemberita: Nur Nabilla
Gambar: Ibanez Jeffery Guang