Industri Aerosingka Miga & Teknologi Moden Pelin Strategik Pemansang Ekonomi Sarawak
KUCHING: Pengawa Sarawak nyerungkai pengulih ngemansangka industri aerosingka miga enggau teknologi moden dipeda nyadi chara strategik ke ulih ngerandang pun penatai pemansang ekonomi baru nengeri tu.
Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar madah, pemansang sektor teknologi nya deka numbuh mayuh pengawa puang begaji besai lebih agi raban profesional enggau bepengelandik.
"Kelimpah ari nya, Sarawak mega deka nyulut ba pengawa nyimpan data enggau penerang perintah ke pengelikun enggau guna Sarawak enggau rayat mayuh," pia ku iya.
Iya madah ke pekara nya maya pengawa ngepun Aum Keterubah Bagi Penggal Kelima Aum Kunsil Nengeri (DUN) Sarawak Ke-19 ditu, Hari Satu.
Iya bela madah ke pemesai reti kerejasama tegap perintah enggau institusyen pelajar, opis menteri bekaul, raban profesional enggau sektor industri dikena ngemansangka pengelandik peranak menua tu dikena nipak guna industri dudi hari.
"Ba pekara tu, opis menteri enggau agensi bekaul pemansang baka Institusyen Pelajar Tinggi enggau TVET enda ulih 'bejalai' kediri tang meseti bisi kerejasama enggau raban industri, penguna, pengereja profesional sereta bepengelandik.
"Tu ulih disungkak nengah latih pengelandik lalu tetipakka guna enggau peminta industri," ku iya madah baru.
Iya madah, pemujur Sarawak ba bidang aerosingka miga, energi gadung enggau ekonomi digital ukai semina bepanggai ba polisi perintah aja tang bela dikemujur ari pengulih nengeri tu nempa raban gawa profesional sereta bepengelandik ke ulih besemekih ba tikas global.
Bela datai maya nya bini Yang di-Pertua Negeri Sarawak Toh Puan Datuk Patinggi Fauziah Mohd Sanusi, Datuk Patinggi Abang Zohari, Speaker DUN Sarawak Tan Sri Datuk Amar Mohamad Asfia Awang Nasar, raban Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, bala Kaban Kunsil Nengeri (ADUN) sereta bala tuai opis perintah. -EDISI UKAS
