Transisyen Energi Beresi Nentu Jamin Energi Meruan & Besemekih
KUCHING: Pengawa Sarawak ba transisyen energi beresi beguna dikena nentu jamin energi meruan sereta besemekih.
Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar madah, pengawa ngena energi beresi baka hidro, solar, bioenergi enggau teknologi kereban api mimit karbon ukai semina nyaup nyaga pengelikun rampa menua tang mega ngerandang peluang ekonomi baru lalu disadang matak mayuh agi pemeranak puku.
"Baka ke ditemu kitai, menua mansang baka Kesatuan Eropah, Jepun enggau Korea Selatan ngemeratka pengawa ngena energi gadung ke ulih dikena baru.
"Pengawa Sarawak ngena mimit karbon deka nentuka Sarawak nyadi palan strategik alai meranak puku, numbuh kerejasama teknologi sereta pemansang industri energi beresi dudi hari," pia ku iya.
Iya bejaku munyi nya maya pengawa ngepun Aum Keterubah Bagi Penggal Kelima Aum Kunsil Nengeri (DUN) Sarawak Ke-19 ditu, Hari Satu.
Ketegal nya, iya beterima kasih ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ke mujur ngatur penemuai gawa ngagai United Kingdom dan Ireland empai lama tu tadi.
Tun Pehin Sri Dr Wan Junaidi madah, pengawa Premier Sarawak nya bela deka numbuh mayuh agi peluang ngemansang ekonomi baru, kerejasama strategik ba teknologi moden, meranak puku, ekonomi digital enggau pemansang modal mensia.
"Sarawak patut nyungkakka agi pengulih tu ngambika nyadi hub energi beresi ulih dikena baru ti deka matak penatai mayuh agi pemeranak puku ari rantau tu enggau antarabansa," ku iya madah baru.
Bela datai maya nya bini Yang di-Pertua Negeri Sarawak Toh Puan Datuk Patinggi Fauziah Mohd Sanusi, Datuk Patinggi Abang Zohari, Speaker DUN Sarawak Tan Sri Datuk Amar Mohamad Asfia Awang Nasar, raban Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, bala Kaban Kunsil Nengeri (ADUN) sereta bala tuai opis perintah. -EDISI UKAS
