KUCHING: Perengka guna dagang nyengkaum ba palan ngetu R&R enggau palan bejual patut disediaka ba sepemanjai jalai projek infrastruktur dikena muka mayuh agi peluang ekonomi ungkup rayat lebih agi di menua pesisir.

Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar madah, pemansang baka jematan besai, Jalai Nebing Tasik, Link Road Sabah-Sarawak enggau jalai ngelawa Brunei ukai semina nyungkak tikas pemanah sistem jalai tang bela tau nyaup ngangkatka agi ekonomi rayat.

"Nya alai, perengka guna bedagang patut digaga ba jalai tu.

"Lalu pia mega, perintah patut meri latih enggau bantu belanja ngagai sida ke deka bedagang," pia ku iya.

Iya bejaku munyi nya maya pengawa ngepun Aum Keterubah Bagi Penggal Kelima Aum Kunsil Nengeri (DUN) Sarawak Ke-19 ditu, Hari Satu.

Kelimpah ari nya, Tun Pehin Sri Dr Wan Junaidi madah, pemansang pengawa dagang menua pesisir, industri mit enggau jelan pemesai (IKS) sereta ekonomi digital patut disungkakka agi dikena nyaup rayat menua pesisir nambah penatai pemisi.

Nya alai, iya minta perintah semampai nyaup ba pekara ngelaku produk menua tu nyengkaum ngaga palan ngumpul, ngatur sereta ngaga kelimpah nyendia palan dagang strategik.

Berebak enggau nya, iya bela madah ke pengulih ngemansangka sektor agro-dagang temuai enggau eko-dagang temuai bepelasarka budaya enggau pesaka rampa menua di Sarawak ke mayuh empai dikemansangka.

Ku iya, program ngelaku ba renggat nasional enggau antarabansa patut disungkakka agi kelimpah nambah pemayuh program 'home stay' enggau latih sereta malin temuai ti dipeda bela ulih nyaup nambah penatai pemisi rayat di menua pesisir.

Iya mega madah, sektor betanam betupi meseti digaga moden agi nengah pengawa ngena automasi, teknologi moden, sistem fertigasi enggau dron.

Bela datai maya nya bini Yang di-Pertua Negeri Sarawak Toh Puan Datuk Patinggi Fauziah Mohd Sanusi, Datuk Patinggi Abang Zohari, Speaker DUN Sarawak Tan Sri Datuk Amar Mohamad Asfia Awang Nasar, raban Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, bala Kaban Kunsil Nengeri (ADUN) sereta bala tuai opis perintah. -EDISI UKAS

Pemberita: Nur Nabilla
Gambar: Ibanez Jeffery Guang