MIRI: Pelajar terus diangkat nyadi pengawa meranak puku strategik timpuh panjai dikena nempa pemansang Sarawak ti maju, moden enggau besemekih manggai 2030 nipak Strategi Pemansang Pengudah COVID-19 (PCDS) 2030.
Sapit Menteri Digital, Datuk Wilson Ugak Kumbong madah, pemansang modal mensia bekualiti meseti ditegap belama dikena nempa rebak biak bepengelandik tinggi ti ulih nyungkak ekonomi nengeri dudi hari.
Ku iya, pemujur rebak biak ba bidang pelajar ukai semina pemujur akademik, tang mega nyadi pugu beguna ngagai pemansang Sarawak nyadi ekonomi bepenatai pemisi tinggi.
“Pelajar ukai semina pemujur akademik, tang mega pengawa meranak puku besai dikena nempa pemansang Sarawak ti maju, moden enggau besemekih,” ku iya lebuh Pengerami Anugerah Penyulut Pelajar Nembiak Dayak serimbai Pengerami Ngintu Gawai Dayak Bagi Menua Miri 2026 kena Hari Enam.
Pengerami nya ngerami 115 nembiak nyulut nyengkaum 66 penerima anugerah Sijil Pelajaran Malaysia (SPM) 2025 enggau 49 penerima peresa Sijil Tinggi Persekolahan Malaysia (STPM) 2024.
Program diatur Komiti Pengerami Gawai Dayak Bagi Menua Miri nya mega ngemata pengawa nyua insentif mata duit sepenyampau RM34,600 kelai ngenang penyulut akademik bala nembiak.
Iya mega bisi nyebut pasal Skim Pelajar Tinggi Pechuma Sarawak (FETS) belabuh ari taun 2026 ngaul palan pelajar tinggi enggi perintah nengeri baka Swinburne University of Technology Sarawak Campus, Curtin University Malaysia, Universiti Teknologi Sarawak enggau Kolej Universiti i-CATS.
Ku iya, nembiak status “Anak Sarawak” ti ngulu degree keterubah deka dipelanja penuh ungkup program dikemendar kelebih agi ba bidang strategik baka STEM, kewangan enggau perakaunan.
Ngenang pemansang teknologi kemaya hari, Datuk Wilson ngingatka rebak biak sedia napi ubah peneras dunya digital enggau pemintar digaga (AI).
Ku iya, teknologi AI ulih nambah penemban belajar nengah pengawa nyendia kereban pelajar ti jampat agi, interaktif enggau mudah dipereti tang rebak biak meseti pintar napi pemar dunya digital baka scam siber, ngerembai berita bula enggau gian media sosial.
Ba pengawa sebaka, iya mega nyua pemeri RM10,000 ngagai komiti pengatur kelai sukung ngemujur program nya. - EDISI UKAS
