SMeC 2026 Diatur Enggau Chara Baru, Disempulang Latih Praktikal Media
KUCHING: Sarawak Media Conference (SMeC) 2026 deka diatur enggau chara baru sereta praktikal ke disempulang enggau program pemansang pengelandik media, teknologi digital sereta nyikap diri nyerumba Pengawa Bepilih Nengeri (PRN) Sarawak ke deka datai.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, program renggat ketiga nya deka diatur kena 8 Julai tu ila ke bisi konferens sehari sebedau diteruska enggau beberapa bengkah woksyop ba Palan Penyulut Teknologi Sarawak (CENTEXS) enggau Tegas Digital Village.
Ku iya, ubah baru nya diatur dikena nentuka program digaga enggau lebih agi relevan, interaktif sereta ulih matak penyereta ari raban nembiak baka nembiak universiti enggau pengemeran media baru.
"Ke sekali tu kitai deka ngatur woksyop ti lebih agi praktikal ke ngaul raban nembiak, nembiak universiti sereta pengemeran media.
"Kelimpah topik bekaul media, kitai mega bisi nyempulang pekara bekaul pengawa dagang, 'artificial intelligence (AI), digital, pengawa ngatur, etika enggau atur bekaul media," pia ku iya.
Iya nerangka pekara nya ba aum media sepengudah Pengawa Ngelai Nyau Pemeri Insentif Khas ngagai gerempung Media Sarawak ba Kunsil Nengeri (DUN) Sarawak, Hari Empat.
Ba pekara bekaul, Datuk Abdullah madah, Unit Komunikasi Awam Sarawak (UKAS) bisi ngelanggur deka ngatur woksyop khas pemberita nyerumba PRN Sarawak ke deka datai.
ku iya, woksyop nya deka meri penerang bekaul ulah, lalau sereta jaku ke engkeman dikena maya pengawa bepilih.
Iya madah, mayuh raban media ke baru empai nemu nyemetak bekaul proses pengawa bepilih baka pelilih ngundi, palan pelilih ngundi sereta penyalah ba atur pengawa bepilih.
Nya alai, ku iya, UKAS mega bisi perambu deka numbuh ‘Election Help Desk’ dikena nyaup pemberita ngulihka penerang baka profil chalun, gambar sereta penerang bekaul PRN.
"Kitai deka nyaup ngemuntangka agi pengawa raban media laban enda semua organisasyen bisi pemberita ke chukup ngaga ripot ba semua 82 iti sitak DUN di Sarawak," ku iya madah baru.
Kelimpah ari nya, Pengerami Hari Pemberita Nasional (HAWANA) renggat nengeri Sarawak bela deka diatur ba pengerami makai lemai lalu bisi nyuaka anugerah khas Premier Sarawak ngagai pemberita ti mayuh jasa ngagai industri pemberita nengeri.
Bela datai maya nya Sapit Sekretari Perintah Sarawak (Operasyen), Datu Hii Chang Kee, Direktor UKAS, Awang Putrayusrie Awang Redzuan, Sekretari Akhbar Kanan ngagai TYT Yang di-Pertua Negeri Sarawak, Samuel Simon enggau Presiden Gerempung Pemberita Sitak Kuching (KDJA) ke mega Kaban Kaunsil Media Malaysia, Ronnie Teo.-EDISI UKAS
