KUCHING: Selangau bisi pengulih nyadi palan penumbuh ekonomi baru ba sitak tengah Sarawak bepun ari langgur deka ngaga palan industri mit enggau jelan pemesai (IKS) ba Pasar Selangau.

Kaban Kunsil Nengeri (ADUN) Tamin Ir Christopher Gira Sambang madah, pemansang ke majak nyadi ba endur nya mandangka Selangau ukai semina nyadi pasar alai sangkai tang ngembuan pengulih nyadi hub ekonomi baru.

"Penumbuh zon industri mit enggau jelan pemesai ulih matak penatai pemeranak puku ba sektor baka industri betanam betupi, pemakai, kayu, logistik, dagang digital, kilang mit sereta dagang mit enggau jelan pemesai (PKS) menua pesisir," ku iya madah.

Iya bejaku munyi nya maya Aum Kunsil Nengeri (DUN) Sarawak Ke-19, Hari Empat.

Ir Christopher Gira mega madah, pekara nya bela deka numbuh mayuh agi kereja puang ungkup raban nembiak di Selangau enggau Tamin.

Ba pekara bukai, iya ngelaluka penemu milih Selangau nyadi siti ari palan industri nupi jani di Sarawak lalu andal tu deka meransang agi pengerembai ekonomi menua nya.

Taja pia, iya minta perintah meri penerang ke nyemetak bekaul projek nya nyengkaum bekaul kereja puang, pengelikun rampa menua, biosekuriti, sistem ngatur teda enggau pemeruan industri timpuh lama.

Iya madah, peranak menua nya meseti bisi kaul enggau projek ngambika projek ulih digaga enggau mujur. -EDISI UKAS

Pemberita: Nur Nabilla
Gambar: Ibanez Jeffery Guang